Elti starfsmann Barnaverndar um Hagkaup með börnin í eftirdragi

Aðalmeðferð í máli ákæruvaldsins gegn Sunnu Guðrúnu Eaton fór fram í Héraðsdómi Reykjavíkur í dag. Málið fjallar um nokkra ákæruliði sem snúa annars vegar að meintu broti Sunnu á nálgunarbanni gegn lögreglumanni og hótanir í garð Halldóru Drafnar Gunnarsdóttur, framkvæmdastýru Barnaverndar Reykjavíkur.

Sunna er sögð hafa hótað Halldóru líkamsmeiðingum og lífláti í samtali við starfsmenn Barnaverndar sumarið 2012. Þar að auki á hún að hafa hringt margsinnis í hana og sent henni tvö smáskilaboð. Í þeim stóð: „Barnaræningi“ annars vegar og „Skítamella“ hins vegar.

Vildi „skera af henni snípinn“

Þar að auki er henni gert að hafa sagt að hún „fantaseraði um það að slíta andlitið af Halldóru“, hoppa á því og einnig skera af henni snípinn og láta eiginmann hennar borða hann.

„Hvenær á ég að hafa sagt þetta? Hvaða rugl er þetta?“ sagði Sunna í dómsal. Dómarinn benti þó á að hljóðupptökur væru til af þessari skýrslutöku lögreglunnar. Sunna kannaðist ekki við að hafa sent umrædd SMS. Samkvæmt lögregluskýrslu frá þessum tíma komu skilaboðin þó úr síma Sunnu.

„Ég hef ekki talað fallega um hana en ég hef aldrei hótað henni. Ég hef kannski sagt að hún væri ljót en ekki hótað henni,“ sagði Sunna.

Sjá einnig: Fékk þrjú nálgunarbönn: Lögga segir ljósmyndir til af Sunnu á svölum við heimili hans

Halldóra sagði að Sunna hefði fyrst reynt að nálgast sig í gegnum Facebook síðla árs 2011. Svo hafi hún elt sig um verslun Hagkaups með hrópum og köllum og kallað sig barnaræningja. Í framhaldi af því hafi símaónæði byrjað og Sunna hafi hringt í bæði heima- og farsíma hennar á kvöldin og næturnar.

Halldóra sagði frá því að í samtali við starfsmann Barnaverndar hafi Sunna sagt að Halldóra væri erkióvinur hennar og að hún vildi sjá hana dauða.

Tvívegis vöruð af lögreglu

Hún sagði að lögreglan hefði tvívegis varað sig við eftir að Sunna hafði hótað henni við annað fólk. Í annað skiptið hafi hún sagt að ef hún ætti byssu væri hún búin að drepa Halldóru og það ætti ekki að koma neinum á óvart ef hún léti af því verða.

„Svo í janúar 2014 sagðist hún vilja meiða mig og helst drepa mig. Þetta er það helsta í stuttu máli,“ sagði Halldóra. Hún tók þó fram að Sunna hefði aldrei hótað sér beint heldur alltaf í gegnum aðra.

Halldóra sagði að vegna starfs síns yrði hún oft fyrir ónæði, en aldrei neinu af þessu tagi. Hún sagðist hafa orðið meira vör við sig og að hún hefði lokað á einkalíf sitt meira en næsti maður.„Þetta hefur verið rólegt fá 2014. Ég vissi ekki af því að þetta mál væri komið fyrir dóm, en var minnst hressilega á það þegar Sunna setti hálftíma myndband á netið.“ Í myndbandinu lýsir Sunna, sem er fjögurra barna móðir, barnaverndarmáli sínu og telur sig hafa verið beitta miklum órétti 2007. Í lok þess birtir hún myndir af Halldóru og nafngreinir hana.

„Það er vegið að mannorði mínu með þessu myndbandi og ég held að ellefu þúsund manns séu búnir að sjá það.“

Verjandi Sunnu spurði hvers vegna það hefði verið kært svo seint fyrst að áreitið hafi byrjað 2011. Halldóra sagði að hún væri að vinna í þannig málaflokki að eðli málsins samkvæmt væri fólk oft reitt og sárt. Hún léti fólk yfirleitt njóta vafans en ekki hefði verið hægt að una lengur við þetta.

Starfsmaður Barnaverndar bar vitni fyrir dómi og sagði frá hótunum Sunnu en þar að auki átti annar starfsmaður að segja sögu sína en sá mætti ekki. Reiknað er með að aðalmeðferð málsins ljúki síðar í mánuðinum.