Bar upp spurningar til ráðherra frá almenningi

Jeremy Corbyn, nýkjörinn formaður breska Verkamannaflokksins, átti í gær sína fyrstu viðureign við David Cameron forsætisráðherra í vikulegum spurningatíma á þingi.

Corbyn hafði sent út beiðni til almennings um að senda sér þær spurningar, sem fólki þykir brýnast að leggja fyrir forsætisráðherra.

„Ég fékk 40 þúsund svör,” sagði Corbyn. Þar af snerust 2.500 um húsnæðismál og 1.000 um heilbrigðisþjónustu við geðsjúka. Þá snerust aðrar 1.000 spurningar um skattaafslætti, sem stjórnin hefur verið að afnema og þar með skerða tekjur margra einstaklinga.

Þessar spurningar bar Corbyn upp í þessum fyrsta spurningatíma forsætisráðherra, en samkvæmt reglum þingsins fær hann einungis að koma með sex spurningar í hvert sinn.

Athygli vakti að Corbyn bar spurningarnar fram með málefnalegum hætti, æsingalaust, þvert á þá hefð sem lengi hefur tíðkast í spurningatíma forsætisráðherrans á breska þinginu.

Cameron sagði þetta vera „öðruvísi, siðfágaðra en venjulega," og reyndi að svara sjálfur í sömu mynt.

„Það þarf smá tíma til að venjast þessum nýja stíl,” sagði Cameron þegar hann hafði farið aftur í gamla farið, og fékk strax skömm í hattinn fyrir frá þingsalnum.

Corbyn var kosinn formaður breska Verkamannaflokksins um helgina, með 60 prósentum atkvæða.

Hann þykir róttækari og vinstrisinnaðri en nokkur leiðtoga Verkamannaflokksins síðustu áratugina, hið minnsta, svo mjög að ýmist hlakkar í hægri mönnum eða þeir hrista hausinn gjörsamlega skilningsvana vegna úrslitanna í formannskjörinu.

Hann vakti hneykslun margra Breta í fyrradag fyrir að taka ekki undir þegar breski þjóðsöngurinn var sunginn við minningarathöfn um látna hermenn, sem haldin var í Pálskirkjunni í London á þriðjudag.

Corbyn er lýðveldissinni, andvígur því að Bretland haldi uppi konungsfjölskyldu, en segist ekki ætla að berjast sérstaklega fyrir því að konungdæmið verði lagt niður.

Hann sagðist ennfremur ekki hafa nein sérstök áform um að taka ekki undir þegar þjóðsöngurinn er sunginn. Hann hafi fyrst og fremst verið mættur í Pálskirkjuna til að minnast hermanna sem féllu í orrustunni um Bretland árið 1940.

„Ég á eftir að mæta til margra viðburða og ég mun taka þátt í þeim að fullu,” sagði Corbyn í gær. „Ég sé ekki að það verði neitt vandamál.”

Nokkur helstu baráttumála Corbyns• Jeremy Corbyn vill að sett verði lög um hámarkslaun í Bretlandi.

• Hann vill banna atvinnurekendum að gera vinnusamninga við starfsfólk án þess að tilgreina fastan fjölda vinnustunda á viku.

• Hann vill endurþjóðnýta járnbrautirnar og fleiri almenn þjónustufyrirtæki, sem Margaret Thatcher einkavæddi á sínum tíma.

• Hann vill losna við fjárlagahallann með því að hækka skatta frekar en að skera niður ríkisútgjöld.

• Hann vill auka skatttekjur meðal annars með því að skera upp herör gegn skattsvikum.