Hallormsstaðaskóli settur á sölu

Fljótsdalshérað og Fljótsdalshreppur hafa auglýst til sölu grunnskóla- og íþróttahúsnæðið á Hallormsstað. Í húsnæðinu hefur Hallormsstaðaskóli verið starfræktur undanfarna áratugi.

Skólabyggingin reis á árunum 1963 til 1967. Byggingu íþróttahúss og sundlaugar lauk í upphafi tíunda áratugarins. Húsnæðið er staðsett í hjarta Hallormsstaðarskógar.

Skólinn er 1787 fermetrar og rúmar fjórtán heimavistarherbergi með snyrtingum og sturtu. Einnig er þar að finna mötuneyti, matsal og setustofu auk kennslurýma og þvottahúss.

Kauptilboð skulu dagsett og undirrituð af bjóðanda. Tilgreina skal fullt nafn bjóðanda, kennitölu, lögheimili og símanúmer. Tilboði skulu fylgja upplýsingar um framtíðarrekstur og notkun hússins.

Kauptilboð skulu berast Fljótsdalshéraði, Lyngási 12, 700 Egilsstöðum, merkt „Kauptilboð – Tækifæri á Hallormsstað“, í síðasta lagi fyrir lok dags þriðjudaginn 30. júní 2015.