Rektorar andvígir tillögum um samstarf

Landbúnaðarháskóla Íslands og Háskólunum á Bifröst og á Hólum verður gert að taka upp formlegt samstarf samkvæmt tillögum starfshóps um ávinning af auknu samstarfi skólanna. Rektorar gagnrýna tillögurnar sem þeir telja þurfa að greina miklu betur.

Í skýrslu starfshópsins sem skilað var í nóvember er lagt til að skipaðir skuli tveir nýir starfshópar til að vinna hugmyndirnar frekar. Annar hópurinn verði skipaður fulltrúum háskólanna og menntamálaráðuneytisins til að finna leiðir að frekari samþættingu náms og ýmissar stoðþjónustu, svo sem tölvukerfa, bókhalds og umsjón verkefna háskólanna. Ríkið leggi vinnunni til fimmtíu milljónir króna. 

Hinum hópunum, sem verði á vegum stjórnarráðsins, verði meðal annars falið að finna leiðir til að gera upp skuldir Landbúnaðarháskólans og Háskólans á Hólum við ríkissjóð sem og að endurfjármagna lán við Íbúðalánasjóð.

Uppsafnaður halli Landbúnaðar­háskólans nemur 422 milljónum króna og Háskólans á Hólum 170 milljónum króna.

Björn Þorsteinsson, rektor Landbúnaðarháskólans, og Erla Björk Örnólfsdóttir, rektor Háskólans á Hólum, skiluðu bæði séráliti fyrir hönd sinna skóla þar sem þau gagnrýndu að ekki lægi fyrir neitt mat á kostum og göllum tillagnanna. Slíkt þyrfti að vera gert áður en ákvörðun um aukinn samrekstur yrði tekin.

„Við viljum ekki breyta um rekstrar­form bara sisvona, einn, tveir og þrír, án þess að það séu gerðar einhverjar úttektir á kostum og göllum rekstrarforma við háskóla,“ segir Björn.

Að sögn Björns er efling samstarfsnets opinberra skóla mun betri lausn. Í skýrslu nefndarinnar er lagt til að ríkið setji 75 milljónir króna í að efla samstarfsnetið. „Það er miklu vænlegri kostur en að fara að skipuleggja samstarf skóla eftir einhverri pólitískri forskrift.“

Einnig er lagt til að háskólarnir fái samtals 182 milljóna viðbótargreiðslu á fjárlögum næsta árs svo þeir geti mætt kröfum sem gerðar séu til þeirra. Meirihluti fjárlaganefndar hefur þegar lagt til að háskólarnir fái megnið af þeirri upphæð, samtals 133 milljónir króna. Björn gagnrýnir að lagt sé til að koma á nýjum garðyrkjuskóla á Flúðum eða Reykholti í Biskupstungum til viðbótar við núverandi garðyrkjuskóla Landbúnaðar­háskólans á Reykjum í Ölfusi sem hafi verið fjársveltur síðustu ár. Hugmyndirnar hafi aldrei verið ræddar innan starfshópsins né heldur við stjórnendur skólans á öðrum vettvangi.

„Við áttum okkur ekki á hvað formennirnir eru að hugsa. Þetta er bara ekki unnin tillaga að neinu leyti. Eins og sakir standa með okkar garðyrkjuskóla núna þá er hann mjög illa settur með ástand bygginga og annað,“ segir Björn.

Formenn nefndarinnar voru Ásmundur Einar Daðason, þingmaður Framsóknarflokksins, og Haraldur Benediktsson, þingmaður Sjálfstæðisflokksins.