Formaður VR telur enga forsendu fyrir hækkun stjórnarlauna VÍS

Stjórn Vátryggingafélags Íslands hefur ákveðið að hækka fasta mánaðarlega þóknun sína í samræmi við það sem ákveðið var á aðalfundi þann 12. mars síðastliðinn.

Á aðalfundinum var ákveðið að föst þóknun yrði hækkuð um 75 prósent þannig að stjórnarmönnum yrðu greiddar 350 þúsund krónur á mánuði og laun stjórnarformanns yrðu hækkuð um 50 prósent svo honum yrðu greiddar 600 þúsund krónur á mánuði. Vegna mikillar umræðu í samfélaginu á þeim tíma var hins vegar ákveðið að hækka ekki launin.

Boðað var til hluthafafundar í VÍS 10. nóvember þar sem ný stjórn var kjörin. Ný ákvörðun um launabreytingu er tekin í framhaldi af því.

VÍS sendi í lok nóvember bréf á viðskiptavini sína þar sem tilkynnt var að iðgjöld yrðu hækkuð vegna slæmrar afkomu. VÍS hagnaðist um tæpa tvo milljarða á fyrstu níu mánuðum ársins, sem er tvöfalt meiri hagnaður en á sama tímabili fyrir ári. Ólafía B. Rafnsdóttir, formaður VR, segir að þessi hækkun stjórnarlauna í VÍS sé ekki í samræmi við þá þróun sem sést hafi á almennum vinnumarkaði og VR sjái einfaldlega ekki forsendur fyrir henni.

Ólafía segir stöðu á vinnumarkaði afar erfiða. Allt stefni í uppsögn kjarasamninga á almenna markaðnum eftir áramót.

Ein af forsendum nýjustu samninganna hafi verið sú að launastefnan sem var samið um yrði stefnumarkandi fyrir aðra kjarasamningagerð. Sú forsenda sé nú brostin.

„Með því að hækka stjórnarlaun núna tekur ný stjórn VÍS þá ákvörðun að ganga þvert gegn þeirri sátt sem náðist í síðustu samningum á vinnumarkaði – og þvert gegn þeirri afstöðu sem fyrri stjórn tók í vor,“ segir Ólafía.

Ólafía segir að það verði að meta ábyrgð stjórnarmanna fyrirtækja á markaði til launa. „Ég er ekki að segja að ekki megi hækka laun stjórnarmanna í VÍS. En það verður að vera í samræmi við það sem gerist og gengur á almenna vinnumarkaðnum,“ segir Ólafía.

Í yfirlýsingu sem stjórn VÍS sendi frá sér í gær segir að launakjör stjórnarmanna VÍS séu svipuð því sem gerist í sambærilegum félögum á markaði.