IKEA ætlar ekki í skaðabótamál vegna jólaljósanna

Verslunin IKEA ætlar ekki að höfða mál vegna jólageitarinnar í Kauptúni sem varð ljósaseríum að bráð á mánudag.  Seríurnar voru keyptar á íslenskum markaði fyrr á þessu ári en svo virðist sem leitt hafi úr seríunni sem varð til þess að eldur kom upp.  

„Tjónið var vissulega töluvert en við ætlum þó ekki í mál. Við erum með sams konar serúr á trjánum hjá okkur og aldrei komið upp nein vandamál,“ segir Þórarinn Ævarsson, framkvæmdastjóri IKEA.

Hann segir seríurnar hafa verið keyptar á eina milljón króna. Geitin hafi kostað ívið meira og því fjárhagslegt tjón umtalsvert. „Þetta var óhefðbundin notkun á seríunum. Þeim er vafið þétt utan um geitina á meðan slíkar seríur hanga vanalega á trjám eða húsþökum.“

Unnið er að því að koma upp nýrri geit. Stefnt var á að það yrði fyrir helgi en aðdáendur geitarinnar þurfa að bíða eilítið lengur. „Ég sé ekki fram á að við náum því fyrir helgi. Þannig að ný geit verður líklega ekki komin upp fyrr en í næstu viku. Hún er þung og mikil og með stærðarinnar hálmbagga sem þarf að vefja utan um hana, þannig að þetta er þó nokkur vinna,“ útskýrir Þórarinn.

Geitin fuðraði upp á örskotsstundu, líkt og sjá má á meðfylgjandi myndbandi.