Svo virðist sem frétt Morgunblaðsins, þess efnis að fyrir lægi ósk frá föngum á Kvíabryggju að þeir fengju að drekka rauðvín með matnum, hafi lagst illa í vistmenn þar, þá ekki síst fanga sem þar dvelja eftir að hafa fengið dóma um stórfelld efnahagsbrot í kjölfar hruns fjármálakerfisins 2008 og afplána nú þar vestra. PR-fyrirtækið, eða almannatengslafyrirtækið, KOM var fengið að málum til að halda því til haga að engin slík beiðni væri frá þeim komin.

Enginn kaupsýslumannanna fór fram á rauðvín með matnum

Björgvin Guðmundsson er einn eigenda KOM og hann segist, í samtali við Vísi, ekki tjá sig um þá vinnu sem þeir inna af hendi fyrir sína viðskiptavini. „En, hluti þeirrar vinnu er að koma upplýsingum á framfæri; hluti þeirrar þjónustu sem við veitum.“

En, eruð þið að starfa fyrir fleiri fanga en einn?

„Ég get ekki tjáð mig um það.“

En, þið hafið starfað fyrir Ólaf Ólafsson, kenndan við Samskip?

„Já, við höfum starfað fyrir hann, ég get staðfest það.“

En, hvað var það sem þú vildir koma á framfæri við Pál?

„Páll Winkel staðfesti að enginn sem hefur verið dæmdur eftir efnahagshrunið 2008 fyrir efnahagsbrot fór fram á að fá að drekka rauðvín með matnum,“ segir Björgvin.

Nú hlýtur það að teljast með sérstæðari verkefnum sem fyrirtæki á sviði almannatengsla tekur að sér?

„Við lítum ekki þannig á það,“ segir Björgvin.

Vilja ekki í PR-stríð

Páli Winkel fangelsismálastjóra finnst það áhugavert að almannatengslafyrirtækið KOM hafi haft samband við sig á laugardegi, en það var þá sem Björgvin ræddi málið við Pál.

„Hann talaði efnislega um að KOM vinni fyrir ótilgreindan hóp fanga sem sé viðkvæmur fyrir umfjöllun sem þessari. Ég hef ekki fengið að vita fyrir hverja KOM vinnur eða hvaða fangar greiða fyrir þeirra vinnu. Mér var bent á að þessir ótilgreindu fangar vildu ekki endilega fara í PR-stríð, eða íímyndarstríð við fangelsisyfirvöld. Hér vinnur enginn almannatengill og enn þá síður almannatengsladeild innan fangelsismálastofnunar enda fer okkar tími og fjármagn almennings í að fullnusta refsingar. Hér er því enginn til að fara í stríð við.“

Segir ekki hvaðan kvörtunin kemur

Fyrir liggur yfirlýsing á síðu Afstöðu, frá föngum á Kvíabryggju svohljóðandi:

„Það er sameiginleg yfirlýsing fanga á Kvíabryggju að enginn kannast við að hafa lagt fram beiðni um að neyta áfengis með mat eins og Páll Winkel segir í morgunblaði dagsins í dag.

-Stjórn Afstöðu Kvíabryggju“

Páll segir að við sig hafi haft samband, á föstudaginn, blaðamaður á Morgunblaðinu sem sagðist hafa heimildir fyrir því að ótilgreindir fangar hafi kært synjun til ráðuneytis, um neyslu áfengis. „Ég sagðist ekkert vita um það en svaraði því til að menn hafi kvartað undan því að fá ekki að neyta víns. Ég vissi hins vegar ekki um neina kvörtun til ráðuneytis.

Ég veit ekki hvort tilkynningin til fjölmiðla hafi verið send frá KOM né hvaða fangar rituðu undir hana. Mér er því ómögulegt að tjá mig frekar um málið auk þess sem ég tiltek ekki hvað einstakur fangi biður um eða óska eftir. Það væri leki.“

Panta ekki svör frá Fangelsismálastofnun

Páll segir ennfremur að almannatengslafyrirtæki panti ekki svör frá Fangelsismálastofnun sem henti ótilgreindum hópi fanga/viðskiptavina.

„Raunar pantar enginn svör frá yfirvöldum sem henta viðskiptavinum almannatengslafyrirtækja. Það hélt ég að menn hefðu lært af Lekamálinu.  Reyndar eru fangar með öflugt félag, Afstöðu, en ég funda reglulega með þeim þar sem farið er yfir málefni fanga.  Þar er tekist á um hlutina en með hreinskiptum samskiptum næst árangur. Þar ræðum við ýmsa hluti og er það réttur farvegur fyrir skoðanaskipti fangelsismálayfirvalda og fanga. Þrátt fyrir að við séum ekki alltaf sammála hefur ýmislegt gott komið út úr þeim fundum,“ segir Páll.