Lög um peningaþvætti ná ekki til greiðslna hjá sýslumönnum

Sýslumannsembættin, sem hafa með höndum nauðungarsölur og uppboð á lausafjármunum, falla ekki undir lög um aðgerðir gegn peningaþvætti og fjármögnun hryðjuverka.

Fjármálaeftirlitinu ber þess vegna ekki að hafa eftirlit með því að embættin séu ekki misnotuð í þeim tilgangi að koma illa fengnu fé í umferð.

Brynjar Kvaran, lögfræðingur hjá Sýslumanninum á höfuðborgarsvæðinu, segir að við kaup á fasteignum á nauðungarsölum sé alltaf greitt inn á reikning embættisins með millifærslum. Á lausafjáruppboðum sé algengast að greitt sé með debetkorti. Í mun færri tilvikum sé greitt með peningaseðlum. Hvorki er tekið við kreditkortum né ávísunum.

Á vef Fjármálaeftirlitsins segir að haft sé eftirlit með því að fjármálafyrirtæki, líftryggingafélög og lífeyrissjóðir, vátryggingamiðlarar og vátryggingaumboðsmenn, útibú erlendra fyrirtækja, greiðslustofnanir og umboðsaðilar þeirra, rafeyrisfyrirtæki og einstaklingar eða lögaðilar sem í atvinnuskyni stunda gjaldeyrisviðskipti eða yfirfærslu peninga og annarra verðmæta fari að ákvæðum laganna og reglugerða og reglna settra samkvæmt þeim.

Brynjar bendir á að uppboð einkaaðila, til dæmis málverkaupp­boð, falli undir fyrrgreind lög.

Á viðskiptavef Sænska Dagblaðsins segir að glufa sé í sænskum lögum þar sem fógetar í Svíþjóð geti tekið við háum upphæðum í reiðufé á uppboðum án þess að þeim beri skylda til að tilkynna viðkomandi eftirlitsaðilum um það. Þar geti kaupendur valið um hvort þeir greiði með reiðufé eða kortum. Haft er eftir fulltrúa fógetaembættisins að embættið tilkynni um greiðslur í reiðufé sem eru yfir 30 þúsundum sænskra króna, eða rúmlega 450 þúsundum íslenskra króna, þótt þess þurfi ekki.