Mega ekki innheimta stefgjöld af afmælissöngnum lengur

Dómstóll í Bandaríkjunum hefur dæmt að fyrirtæki sem innheimt hefur stefgjöld af afmælissöngnum búi ekki yfir gildum höfundarrétti af laginu. Warner/Chappell hlaut höfundarréttinn árið 1988.

Í dómnum segir að höfundarréttur fyrirtækisins nái einungis til ákveðinnar útsetningar á laginu en ekki lagsins sjálfs.

Í frétt BBC segir að lagið hafi verið samið af systrunum Mildred og Patty Hill frá Kentucky árið 1893. Nefndu þær lagið Good Morning To All sem þróaðist síðar í afmælissönginn sem sunginn er víðs vegar um heim, þar á meðal á Íslandi.

Warner/Chappell hefur innheimt stefgjöld af laginu frá árinu 1988. Félagið keypti réttinn af Birch Tree Group sem áður var Clayton F Summy Co sem krafðist höfundarréttarins árið 1935.

Áætlað er að Warner/Chappell hafi hagnast um tvær milljónir Bandaríkjadala á hverju ári vegna notkunar á laginu í kvikmyndum, sjónvarpsþáttum, auglýsingum eða á opinberum stöðum.