Vigdís ítrekað sögð fara með rangt mál

Vigdís Hauksdóttir, þingmaður Framsóknarflokksins og formaður fjárlaganefndar, telst til einskonar methafa á hinum pólitíska akri þá hvað varðar að vera sökuð um að fara með rangt mál. Ef marka má einfalda leit á Google þá virðist sem hún sé einskonar Munchhausen hinna íslensku stjórnmála.

Sé slegið inn í leitargluggann „Vigdís „rangt mál““ þá koma upp 11.100 niðurstöður. Vissulega tekur leitin til fleiri atriða en þeirra að um sé að ræða Vigdísi sem fer með „rangt mál“, en þau eru hins vegar mýmörg. Nýjasta dæmið um það er frá í gær þegar Vigdís er sögð fara með rangt mál er frétt RÚV af ummælum Vigdísar um Isavia, að fyrirtækið skuli boða lokun flugvalla, því hún telur að stofnunin hafi ekki nýtt það fjármagn sem hún fékk til viðhalds flugvalla á landbyggðinni á þessu rekstrarári. Guðni Sigurðsson, upplýsingafulltrúi Isavia, segir Vigdísi fara með rangt mál.

Þylja mætti upp fjölmörg dæmi af sama toga og hafa velflestir fjölmiðlar birt af því fréttir þar sem Vigdís er sögð fara með „rangt mál“.

Vigdís segist, í stuttu samtali við Vísi, ekki vera að stressa sig á þessu: „Nei, ég hlæ. Enda veit ég betur,“ segir Vigdís.

En, hvernig má þetta vera? Fer hún ítrekað með fleipur eða eru menn að rýna í málflutning hennar, líkt og þeir séu með hana á heilanum, í leit að götum?

„Þetta er gamla trixið sem notað er af karlmönnum í valdastöðum á konur sem eru í stjórnmálum – ég hef gaman að þessu þar sem enginn af þessum mönnum hefur þorað að mæta mér í efnislegri umræðu,“ segir Vigdís Hauksdóttir:

„Aumt yfirklór og verið að beina sjónum í aðra átt en að því efnislega innihaldi og brotalömum í kerfinu sem ég er sífellt að benda á sem varðmaður skattgreiðenda í landinu.“