Leita námuverkamanns: Sprenging í Indlandi varð 89 manns að bana

Yfirvöld á Indlandi leita að námumanni sem sagður er eiga sök á sprengingu á mið-Indlandi í gær sem varð 89 manns að bana og særði um hundrað til viðbótar. Rannsókn stendur yfir á hvað olli sprengingunni sem varð nánar tiltekið í Jhabua héraði.

Maðurinn heitir Rajenda Kaswa og er sakaður um að hafa geymt sprengiefni í íbúðabyggingunni þar sem sprengingin varð. Meðal þeirra látnu eru viðskiptavinir veitingastaðar sem var í húsinu við hliðina en sprengingin olli einnig skemmdum á húsum sem stóðu hinu megin við götuna.

„Hópar af lögreglumönnum hafa dreift sér víðsvegar um svæðið til þess að ná honum,“ segir Seema Alawa, yfirmaður lögreglunnar í Jhabua í Madhya Pradesh ríki. Lögreglan hefur lokað vöruskemmum í eigu Kaswa.

Lög á Indlandi leyfa ekki að íbúðabyggingar séu nýttar undir verslana- og fyrirtækjarekstur en þessum reglum er sjaldnast fylgt eftir.