Tvö börn greinast með lömunarveiki í Úkraínu

Tvö tilfelli lömunarveiki hafa komið upp í suðvesturhluta Úkraínu. Alþjóðaheilbrigðisstofnunin WHO staðfestir að tilfellin séu þau fyrstu í landinu frá 1996 og þau fyrstu í Evrópu frá 2010.

Um er að ræða tvö börn – eitt fjögurra ára og annað tíu mánaða, en talsmaður WHO segir Úkraínumenn vera í sérstakri smithættu vegna ónægra bólusetninga í landinu.

Í frétt SVT kemur fram að á síðasta ári hafi einungis helmingur úkraínskra barna verið ónæm fyrir lömunarveiki og öðrum sjúkdómum sem koma megi í veg fyrir með bólusetningum.

Hætta á útbreiðslu í landinu er talin vera mikil að dómi WHO. Hætta á útbreiðslu í nágrannalöndunum Rúmeníu, Póllandi, Ungverjalandi og Slóvakíu er hins vegar talin lítil.

Lömunarveiki eða mænusótt er smitsjúkdómur af völdum veiru sem leggst getur á taugakerfi líkamans og valdið lömun sem leitt getur til dauða. Þeir sem eru í mestri hættu á að veikjast af sjúkdómnum eru nýburar, ung börn og óbólusettir einstaklingar. Nánar má lesa um sjúkdóminn á vef landlæknis.