Segja dýrum í gæludýraverslun lógað með klóróformi

Tveir fyrrum starfsmenn gæludýraverslunar í Reykjavík gagnrýna aðbúnað dýra þar og segja að starfsmenn hafi meðal annars lógað dýrum í versluninni með klóróformi. Matvælastofnun hefur gert alvarlegar athugasemdir um aðbúnað í versluninni en eigandinn vísar ásökunum alfarið á bug. 

Íris Lea Þorsteinsdóttir og Ingibjörg Kristjánsdóttir störfuðu báðar í Dýraríkinu í Holtagörðum um tímaþ Báðum blöskraði þeim aðbúnaður dýranna í versluninni.

„Allt of lítil búr, ryðguð, brotin, dýrin voru að klemma sig missa tær og skott. Þetta var bara hræðilegt,“ segir Íris.

„Svo gekk hann of langt með að fara ekki með dýr til dýralæknis þegar að þess þurfti,“ segir Ingibjörg.

Báðar segjast þær hafa farið með dýr úr búðinni til dýralæknis og borgað fyrir það úr eigin vasa. Lögum samkvæmt mega aðeins dýralæknar af­lífa gælu­dýr, nema í neyðar­vik­um. Íris og Ingibjörg störfuðu í versluninni á misjöfnum tíma en segjast báðar hafa orðið vitni að því að að starfsfólk hafi séð um að lóga dýrum með klóróformi.

„Við vorum með gamla stóra krukku og hann hellir klóróformi í handklæði. Það er sett í botninn á krukkunni ásamt dýrunum og svo er krukkunni lokað og öllum sagt að fara fram. Af því að það er ekki nógu skemmtilegt að horfa á þetta. Dýrið getur ekki andað og kafnar og deyr.“

Samkvæmt upplýsingum frá Konráð Konráðssyni, dýralækni hjá MAST, fór eftirlitsfólk í dýrabúðina fyrir rúmri viku eftir að hafa fengið ábendingar um málið. Konráð staðfestir að MAST hafi gert alvarlegar athugasemdir við að búr dýranna væru of lítil og að smá­dýr væru drep­in þar með klóró­formi.

Gunnar Vilhelmsson eigandi Dýraríkisins vísar þessum ásökunum alfarið á bug.

„Það er rétt að það er til klóróform hérna. Það er rétt. En það gerir okkur ekki að dýramorðingjum, ekki frekar en að það finnist steikarhnífur í eldhúsinu hjá þér. Það gerir þig ekki að morðingja,“ segir Gunnar.

„Við höfum ekki verið að svæfa hérna með klóróformi. Það er ekki rétt.“

Þá segir hann einhverjar myndanna frá fyrrverandi starfsfólki verslunarinnar vera uppstilltar og til þess gerðar að eyðileggja mannorð hans.

„Maður er kominn með myndir frá það mörgum stöðum og það mörgum mismunandi starfsmönnum að ég veit ekki hverslags allsherjar samsæri það er. Að við höfum allar tekið okkur saman á mismunandi tímum, án þess að þekkja hvora aðra, að setja þessar myndir upp,“ segir Ingibjörg.

Gunnar kveðst vera miður sín vegna málsins íhugar nú að leita réttar síns.

„Ég er miður mín út af þessu.“