Gígur í Úralfjöllum þrefaldast á tíu mánuðum

Gígur sem þegar hefur eyðilagt tuttugu byggingar í Úralfjöllum í Rússlandi hefur þrefaldast að stærð síðustu tíu mánuði og er nú orðinn 120 metrar að þvermáli.

Gígurinn myndaðist fyrst í kjölfar þess að fyrrum náma nærri bænum Solikamsk féll saman í lok árs 2014.

Að sögn breska ríkisútvarpsins er talið að holan hafi myndast vegna rofs í námunni sem rekja má til flóða.

Náman er nú 76 metra djúp og 120 metrar að þvermáli og hefur nú þegar gleypt tuttugu byggingar og eru mun fleiri byggingar á hættusvæði.

Nýjustu myndir benda til að fyrra mat sérfræðinga um að gígurinn sé nú „nokkurn veginn stöðugur“ sé því ekki rétt.

Námunni var lokað í nóvember á síðasta ári eftir að holan myndaðist 3,5 kílómetrum austar og tókst að koma öllum 1.300 starfsmönnum námunnar í öruggt skjól.

Talsmaður námufyrirtækisins Uralkali segir að allt sé nú gert til að lágmarka skemmdirnar vegna stækkandi gígsins.

Að neðan má sjá innslag BBC um gíginn.