Hinn grunaði dæmdur þjófur: Þýfið úr Úr og gull ófundið

Maðurinn sem grunaður er um að hafa brotist inn í skartgripaverslunina Úr og Gull í verslunarmiðstöðinni Firði í Hafnarfirði um Verslunarmannahelgina hefur áður komist í kast við lögin fyrir brot af sama tagi. Maðurinn lét greipar sópa snemma morguns sunnudaginn 2. ágúst og telja eigendur búðarinnar að andvirði þýfisins hlaupi á milljónum.

Helgi Gunnarsson, rannsóknarlögreglumaður sem stýrir rannsókninni hjá lögreglunni á höfuðborgarsvæðinu, segir í samtali við Vísi að þýfið hafi ekki fundist enn sem komið er. Hann staðfestir að hinn grunaði, sem sé um þrítugt, hafi áður verið dæmdur fyrir innbrot og þjófnað.

Myndbandið skilaði góðum ábendingum

Lögreglan birti myndband frá ferð þjófsins í Firðinum umræddan morgun. Helgi segir að góðar ábendingar hafi borist sem hafi komið lögreglu á spor hins grunaða. Þá hafi einnig spilað inn í að lögregla þekkti til mannsins.

Rannsókn málsins gengur ágætlega að sögn Helga og er verið að skoða ýmsar hliðar málsins. Enginn annar hefur verið handtekinn vegna málsins. Manninum var sleppt að lokinni skýrslutöku en ekki þótti ástæða til þess að fara fram á gæsluvarðhald yfir honum. Leitað var á heimili mannsins.

Eins og fram hefur komið var öryggiskerfið tekið af Firðinum skömmu áður en þjófurinn lét til skarar skríða. Það hefur hingað til verið talið ótengt þjófnaðinum og ekkert hefur breyst í þeirri skoðun lögreglu að sögn Helga.