KR missti bara einn leikmenn í bann í gær

KR tryggði sér í gær sæti í 2. umferð forkeppni Evrópudeildarinnar með 2-1 sigri á Cork City frá Írlandi eftir framlengdan leik.

Fyrri leiknum á Írlandi lyktaði með 1-1 og KR-ingar unnu því viðureignina samanlagt 3-2.

KR bíður erfitt verkefni í næstu umferð en þar mætir liðið Rosenborg, toppliði norsku úrvalsdeildarinnar.

Fyrri leikurinn verður á Alvogen-velli þeirra KR-inga 16. júlí, en seinni leikurinn á Lerkendal Stadion í Þrándheimi 23. júlí.

KR-ingar verða án þriggja sterkra leikmanna í fyrri leiknum en þeir Skúli Jón Friðgeirsson, Aron Bjarki Jósepsson og Pálmi Rafn Pálmason verða í leikbanni.

Skúli Jón var rekinn af velli undir lok fyrri hálfleiks gegn Cork þegar hann fékk að líta sitt annað gula spjald.

Þá fengu Aron og Pálmi báðir gult spjald, líkt og í fyrri leiknum, og eru því komnir í bann.

Uppfært 08:50:

Samkvæmt reglum UEFA fara leikmenn í bann eftir þrjú gul spjöld en ekki tvö eins og áður. Aron Bjarki og Pálmi Rafn geta því spilað fyrri leikinn gegn Rosenborg. Fái þeir hins vegar gult spjald í þeim leik verða þeir í banni í seinni leiknum í Þrándheimi.