Funheitur Elías Már skoraði í sigri Vålerenga

Elías Már Ómarsson virðist vera í góðu standi þessa dagana en hann skoraði fyrra mark Vålerenga í 2-0 sigri liðsins á Sandefjord í 16. umferð norsku úrvalsdeildarinnar.

Mark Elíasar kom á 12. mínútu en þetta var þriðja mark Elíasar í tveimur leikjum því hann skoraði bæði mörk Vålerenga í síðustu umferð gegn Odd. Kjetil Waehler skoraði síðara mark liðsins í dag.

Vålerenga er fyrir vikið í 2. sæti deildarinnar með 30 stig, jafn mörg stig og Stabæk en hagstæðari markatölu. Stabæk á hins vegar leik til góða gegn Sarpsborg á morgun. Sandefjord situr hins vegar kirfilega í neðsta sæti deildarinnar með 9 stig.