Kúba sendi Pablo heim til Stjörnunnar

El Salvador er úr leik í Gullbikarnum sem nú stendur yfir í Bandaríkjunum en þetta varð ljóst eftir 1-0 sigur Kúbu á Gvatemala í lokaleikjum riðlakeppninnar í nótt. Pablo Punyed, leikmaður Stjörnunnar, hefur verið fastamaður í liði El Salvador í keppninni.

Tvö af liðunum þremur sem urðu í þriðja sæti riðlanna komust áfram í 8-liða úrslitin en El Salvador var með verstan árangur af þeim. El Salvador hefði komist áfram ef leik Kúbu og Gvatemala hefði lyktað með jafntefli.

Maykel Reyes skoraði markið sem tryggði Kúbverjum sigur á 73. mínútu leiksins en það var fyrsta mark Kúbu í keppninni. Liðið tapaði fyrsta leiknum í keppninni fyrir Mexíkó, 6-0, og svo fyrir Trinídad og Tóbagó, 2-0. Kúba er langversta markahlutfall allra liða í keppninni eftir riðlakeppnina.

Trinídad og Tóbagó tryggði sér sigur í riðlinum eftir 4-4 jafntefli gegn Mexíkó. Trinídad og Tóbagó fékk þó mörk á sig á 88. og 90. mínútu en síðara markið var sjálfsmark Kenwyne Jones.

Yohance Marshall náði þó að tryggja Trinídad og Tóbagó dramatískt jafntefli með mark á þriðju mínútu uppbótartímans.

Aron Jóhannsson og félagar hans í bandaríska landsliðinu mæta Kúbu í 8-liða úrslitum keppninnar en leikurinn fer fram á laugardag.

8-liða úrslitin:

18. júlí:

Bandaríkin - Kúba

Haítí - Jamaíka

19. júlí:

Trinídad og Tóbagó - Panama

Mexíkó - Kosta Ríka