Arnór Ingvi lagði upp í uppgjöri toppliðana

Norrköping tók á móti Gautaborg í toppslag sænsku úrvalsdeildarinnar í dag og var leiknum að ljúka með 2-2 jafntefli. Arnór Ingvi Traustason var í byrjunarliði Norrköping og lagði upp eitt mark. Hjálmar Jónsson sat allan tímann á varamannabekk Gautaborgarliðsins.

Gautaborg komst yfir eftir átján mínútna leik en það mark skoraði Gustav Svensson. Tíu mínútum síðar jafnaði Emir Kujovic og þannig var staðan í hálfleik. Gautaborg komst aftur yfir um miðbik síðari hálfleiksins en þegar tíu mínútur lifðu leiks jafnaði miðjumaðurinn Aleksander Fransson metin eftir undirbúning frá Arnóri Ingva. Arnóri var skipt út af á 89. mínútu.

Jafnteflið þýðir að  Gautaborg er enn með þriggja stiga forystu á toppi deildarinnar en Norrköping er í öðru sæti með 32 stig. Elfsborg getur komist upp fyrir Norrköping með sigri í sínum leik og Djurgarden getur náð upp að hlið liðsins.