Davíð Þorláksson skipaður í nýja stjórn LÍN

Ný stjórn Lánasjóðs íslenskra námsmanna var skipuð í gær. Einn stjórnarmanna er Davíð Þorláksson, héraðsdómslögmaður, en hann var skipaður af fjármála- og efnahagsráðherra.

„Ég er skipaður af fjármálaráðherra og ætla að fylgja stefnu hans,“ segir Davíð aðspurður um skipanina. Árið 2011 var Davíð kjörinn formaður Sambands ungra sjálfstæðismanna en í fjárlagatillögum stjórnar SUS fyrir árið 2012 var meðal annars talað um að leggja ætti LÍN niður.

„Ég er lögmaður og hef setið í ýmsum stjórnum. Ég fer ekki inn í stjórnina sem pólítíkus heldur sem lögmaður. Þegar þú ert skipaður í stjórn þá fylgirðu stefnu eigandans sem í þessu tilfelli er ríkið.“

Mennta- og menningarmálaráðherra skipar formann stjórnarinnar, varaformann og einn fulltrúa, námsmannahreyfingarnar SÍNE, SHÍ BÍSN og SÍF eiga hver sinn fulltrúa í stjórninni og að lokum skipar fjármála- og efnahagsráðherra einn fulltrúa.

Auk Davíðs skipa Jónas Friðrik Jónsson, formaður, Anna Sigríður Arnardóttir og Katrín Helga Hallgrímsdóttir stjórnina en þau voru útnefnd af mennta- og menningarmálaráðherra. Aðrir í stjórninni eru Tryggvi Másson, tilnefndur af SHÍ, Hjördís Jónsdóttir, tilnefnd af SÍNE, Halldór Hallgrímsson Gröndal, tilnefndur af BÍSN og Laufey María Jóhannsdóttir, tilnefnd af SÍF.