Meintur vændisstaður: Ökutæki metin á tugi milljóna á meðal þess sem eigandi Strawberries fær ekki að nálgast

Hæstiréttur staðfesti í dag úrskurð Héraðsdóms Reykjavíkur þar sem kröfu Viðars Más Friðfinnssonar, eiganda kampavínsstaðarins Strawberries, um að kyrrsetningar sýslumannsins í Reykjavík á ákveðnum eignum Viðars yrðu felldar úr gildi, var hafnað. Um er að ræða fjórar kyrrsetningaraðgerðir frá 8. nóvember 2013, sem taka meðal annars til tuttugu ökutækja að verðmæti um fimmtíu milljóna króna.

Rannsókn hófst vegna ítrekaðra ábendinga um vændisstarfsemi

Viðar Már var haustið 2013 handtekinn og færður í varðhald ásamt fimm öðrum í tengslum við rannsókn lögreglu á starfsemi Strawberries. Hann sætti gæsluvarðhaldi í tvær vikur. Lögregla hóf rannsóknina í kjölfar ítrekaðra ábendinga um að vændisstarfsemi færi fram á staðnum, að því er fram kemur í dómsorðum.

Sjá einnig: Kampavínsklúbbum lokað fyrir fullt og allt

Lögregla fór fram á það við sýslumannsembættið að tilteknar eignir Viðars Más yrðu kyrrsettar, meðal annars vegna þess að hætta var talin á því að eignunum yrði skotið undan eða að þær glötuðust eða rýrnuðu til muna.

Í kröfu Viðars Más segir meðal annars að aðgerðir lögreglu hafi valdið honum ótæpilegu fjártjóni og mannorðshnekki. Þá hafi hald lögreglu á gögnum staðið honum í vegi fyrir að greiða opinber gjöld, tryggingar og þvíumlíkt. Hann áskilji sér því rétt til að halda uppi kröfu til bóta þar sem félög hans hafi verið sektuð vegna vanskila og innheimtuaðgerðir hefjist bráðlega.

Í kröfunni er einnig tekið fram að samkvæmt stjórnarskránni eigi þegnar landsins rétt til þess að fá úrlausn um ákæru á hendur sér innan hæfilegs tíma. Jafnframt er vísað til þess að sakborningum sé tryggður réttur til málsmeðferðar án óhæfilegs dráttar, en sem fyrr segir hófust aðgerðir lögreglu síðla árs 2013.

Greiddi fyrir ökutæki með fullum poka reiðufjár

Lögregla vísaði meðal annars til þess fyrir dómi að ávinningur af ætlaðri brotastarfsemi Viðars kunni að hlaupa á hálfum milljarði króna og verðmæti hinna kyrrsettu muna sé mun minna. Jafnframt telji lögregla sönnunarstöðu vegna ætlaðra brota Viðars Más mun sterka og því þyki ljóst að þeir fjármunir sem kyrrsettir hafa verið við rannsókn málsins verði gerðir upptækir með dómi.

Samkvæmt lögreglu lúta ætluð brot Viðars ekki aðeins að skipulegri vændisstarfsemi heldur stórfelldum skattalagabrotum og ætluðum peningaþvætti. Eftirgrennslan hafi leitt í ljós að greiðslu fyrir ökutækin sem kyrrsett hafa verið hafi í mörgum tilvikum borið að með sérkennilegum hætti, til dæmis með fullum poka reiðufjár.

Sjá einnig: Kampavínsstúlkur ekki starfsmenn

Rannsókn lögreglu á starfsemi Strawberries er lokið og gögn málsins voru send ríkissaksóknara til frekari meðferðar í desember síðastliðnum. Jafnframt var skattyfirvöldum gert viðvart um ætluð skattalagabrot Viðars Más og félaga honum tengdum í maí, en í greinargerð lögreglu segir að ákæra verði ekki gefin út á hendur honum án undanfarandi meðferðar skattyfirvalda.

Bæði héraðsdómur og Hæstiréttur hafa nú hafnað kröfu Viðars Más um að kyrrsetningarnar verði felldar úr gildi. Var ekki fallist á að málið í heild hefði dregist svo lengi að ástæða sé til að verða við kröfunni, þó héraðsdómur segi í úrskurði sínum að það sé aðfinnsluvert hve seint formlegt erindi var sent skattrannsóknarstjóra.