Stúdentsefni í MS staðin að svindli: Fá ekki að útskrifast með samnemendum sínum

Níu nemendur í útskriftarárgangi Menntaskólans við Sund voru staðnir að svindli í stúdentsprófi í þýsku á dögunum. Fallist þeir á tilboð skólastjóra mun málið ekki tefja þá í námi. Þeir munu þó ekki taka við skírteinum sínum ásamt samnemendum sínum þegar húfurnar fara á loft um mánaðarmótin.

„Það sorglegasta við þetta mál er að flestir þessir nemendur þurftu ekkert á þessu að halda. Þetta eru ágætir námsmenn og ekki eins og þeir hafi þurft að bjarga sér frá falli,“ segir Már Vilhjálmsson, skólastjóri MS í samtali við Vísi.

Nemendur máttu mæta með orðabók í umrætt próf. Svindlið fólst hins vegar í því að gögn voru falin í orðabókinni. Var nemendum vikið úr prófinu, prófgögn gerð upptæk og þau send á fund skólastjóra. Þau fá sjálfkrafa núll í prófinu.

Ósanngjarnt gagnvart öðrum nemum fengu þau að fagna

Már segir að búið sé að úrskurða í málinu og nemendunum hafi öllum verið send bréf. Þar bjóðist þeim tvær leiðir til þess að ljúka námi sínu þannig að svindlið muni ekki hafa áhrif á möguleika þeirra til að hefja háskólanám í haust. Þau fái hins vegar ekki að gleðjast með samnemendum þann 31. maí. Það væri ósanngjarnt að nokkrir nemendur fengu aukatækifæri og gætu svo fagnað með hinum nemendunum eins og ekkert hefði í skorist.

Nokkrir nemendur hafa þegar svarað bréfi Más og þekkjast boðið. Hann hafi einnig heyrt af óánægðum nemendum sem hafi sagst hafa ætlað að gera athugasemdir til menntamálaráðuneytisins þar sem þeir séu ekki sáttir við niðurstöðuna í málinu. Már segir það rétt þeirra og verði að fara sína leið.

Að sögn Más, sem gegnt hefur stöðu skólastjóra í MS frá árinu 2001, hefur aðeins einu sinni í hans tíð komið upp að útskriftarnemendur voru staðnir að prófsvindli. Þrír nemendur svindluðu í stúdentsprófunum 2002. Síðan þá hafi ekki komið upp svindl hjá útskriftarnemum svíki minnið hann ekki.

Prófaeftirlitsfólk stóð nemanna að verki

Aðspurður hvernig upp hafi komist um svindlið segir Már nemendurna einfaldlega hafa verið staðna að verki af prófaeftirlitsfólki. Ekki hafi verið skoðaðar allar orðabækur nemenda í kjölfarið.

„Það má ekki valda frekari röskun í prófi en nauðsynlegt er,“ segir Már. Almennt sé gengið út frá því að fólk sé heiðarlegt.

Talið er að 2-3 nemendur hafi mögulega haft samráð um svindlið en ekkert bendi til annars en að hinir hafi hver um sig tekið ákvörðun um að svindla.

Fólk byrjað að plana veislu

Síminn hefur ekki stoppað hjá Má undanfarið og eru skiptar skoðanir á ákvörðunum skólayfirvalda. Sumum finnist þau alls ekki nógu ströng á meðan öðrum finnist þau hafa farið yfir strikið gagnvart nemendum.

„Sitt sýnist hverjum,“ segir Már sem er vel meðvitaður um hve viðkvæmt málið sé. Fjölskyldur hafi verið byrjaðar að undirbúa veislur og svo hafi þetta áhrif innan skólans líka.

Hann vill að svo stöddu ekki útskýra nánar í hverju kostir nemendanna felist en ítrekar að gangi þau að öðrum þeirra ætti ekkert að koma í veg fyrir háskólanám í haust.

Mbl. greindi fyrst frá málinu