Búið að ræða við foreldra stúlkunnar sem stóð að milljóna þjófnaði

„Við vitum núna hver þau eru,“ segir Ragnar Ólason, einn af eigendum byggingarfélagsins Mótanda, en fjöldi ábendinga hafa borist til fyrirtækisins eftir að Vísir sagði frá innbroti inn á byggingarsvæði fyrirtækisins í gær.

Rándýrum tækjum var stolið og var tjónið sagt hlaupa á milljónum. Maður og kona voru að verki og birti Mótandi myndband af þeim á Facebook-síðu sinni. Ragnar segir forsvarsmenn Mótanda vita nú hver þau eru.

Sjá einnig:Milljóna króna þjófnaður á byggingarsvæði

Búið að tala við foreldra

„En við vitum ekki hvar þau eru. Það er búið að fara heim til foreldra stelpunnar og mamma hennar staðfesti að þetta er hún á myndbandinu,“ segir Ragnar.

„Lögreglan er með þetta mál og við komum til með að láta hana vita hvernig staðan er og förum í það á eftir.“

Við Mótandamenn og verktakar hjá okkur urðum fyrir því að brotist var inn á vinnusvæði okkar við Álfhólsveg 22 um fimmleytið í nótt (6.maí 2015). Þetta eru brot úr öryggismyndavél á svæðinu – málið hefur verið tilkynnt til lögreglu, en ef þið getið gefið einhverjar upplýsingar um málið þá endilega hafið samband..... Höfum fengið ábendingu um að bíltegundin sé Suzuki Liana

Posted by Mótandi ehf. on Wednesday, May 6, 2015

Tæplega korter að brjótast inn

Tvímenningarnir hafa að öllum líkindum verið búnir að undirbúa þjófnaðinn þar sem þau voru fljót að athafna sig. Eins og sést á myndbandinu eru þau rétt tæplega korter að brjótast inn, fylla bílinn af verkfærum og keyra í burtu.

Byggingarsvæðið er afgirt en klippt var á mótavír sem heldur girðingu þess saman. Svæðið er í Kópavogi, nánar tiltekið við Álfhólsveg 22, en þar á að reisa sextán íbúða blokk. Parið fór einnig inn í fjórar íbúðanna með því að spenna upp glugga og hlutust af því skemmdir.

Ef einhver hefur upplýsingar um málið er sá hinn sami beðinn að hafa samband við lögreglu eða Ragnar Ólason beint í síma 6618820.