Sólin lætur sjá sig á verkalýðsdaginn

Verkalýðsdagurinn, 1. maí, verður sólríkur á Suðurlandi ef marka má veðurspá Veðurstofu Íslands. Þó mun rigna suð-austan lands. Norðurland verður áfram hvítt en lítilsháttar snjókoma verður þar á morgun. Hiti verður allt frá -8 gráðum að 5 gráðum á celsíus, hlýjast á suð-vesturlandi. Gera má ráð fyrir nokkrum vindi áfram næstu daga. Næstu vikuna verður áfram fremur milt en kalt veður á Suðurlandi og snjór fyrir norðan.

Hér má sjá spá Veðurstofunnar fyrir næstu daga fengin af vedur.is:

Norðaustlæg eða breytileg átt 5-10 m/s, hægari vindur á S-verðu landinu á morgun. Slydda eða rigning SA-lands og dálítil snjókoma NA-til í kvöld, annars úrkomulítið. Lítilsháttar snjókoma eða él fyrir norðan og austan á morgun, en yfirleitt þurrt S- og V-lands. Hiti 1 til 8 stig að deginum, en um eða undir frostmarki fyrir norðan og austan.

Veðurhorfur á landinu næstu daga

Á laugardag: Austan 5-13 m/s. Skýjað með köflum og yfirleitt þurrt, en dálítil él A-lands og við S-ströndina. Hiti 1 til 7 stig að deginum, en um eða undir frostmarki á NA- og A-landi.

Á sunnudag: Norðaustan og austan 8-15 m/s, hvassast syðst. Bjartviðri SV- og V-lands, en skýjað og stöku él fyrir norðan og austan. Hiti breytist lítið.

Á mánudag: Norðaustan 8-15 m/s. Dálítil él N- og A-lands, en skýjað með köflum og þurrt á S- og V-landi. Hiti 3 til 8 stig að deginum, en í kringum frostmark fyrir norðan og austan.

Á þriðjudag: Norðaustanátt og snjókoma eða él fyrir norðan, slydda eða rigning SA-lands en yfirleitt þurrt á SV- og V-landi. Hiti 0 til 8 stig, mildast SV-lands.

Á miðvikudag: Útlit fyrir norðanátt með úrkomu á N-verðu landinu, en þurru veðri syðra.