Støre segir Noreg eiga að taka á móti 10 þúsund sýrlenskum flóttamönnum

Jonas Gahr Støre, formaður norska Verkamannaflokksins, segir að Noregur eigi að taka á móti 10 þúsund sýrlenskum flóttamönnum á næstu tveimur árum.

Støre lét orðin falla á landsfundi Verkamannaflokksins sem settur var í Folkets hus í Ósló í dag og lýkur á sunnudag.

Formaðurinn sagði að taka ætti á móti fimm þúsund í ár og öðru eins árið 2016.

„Við sjáum svæði þar sem milljónir eru á flótta. Heimurinn hefur ekki orðið vitni af öðru eins frá síðari heimsstyrjöldinni,“ sagði Støre og sagði þau lönd sem væru þess fær ættu að taka á móti flóttafólki.

Í frétt norska ríkisútvarpsins segir að nú sé pólitískur meirihluti í Noregi fyrir því að taka á móti 10 þúsund flóttamönnum frá Sýrlandi á næstu árum.

Verkamannaflokkurinn er nú í stjórnarandstöðu en mælist stærstu flokkurinn í skoðanakönnunum.