Skátar þurfa ekki lengur að sverja Guði hollustu

Skátaþing, sem nú stendur yfir á Selfossi, hefur samþykkt breytingartillögu á skátaheitinu sem felur það í sér að skátar þurfa ekki lengur að sverja Guði og ættarjörðinni hollustu. Tillagan var samþykkt með um sjötíu prósentum atkvæða.

„Þetta er búið að vera mjög lengi í vinnslu,“ segir Arnór Bjarki Svarfdal skáti. „Það hafa verið umræður um þetta á síðustu fimm Skátaþingum, þetta er búið að vera í vinnuhóp á vegum Skátabandalagsins og það hafa verið gerðar skoðanakannanir á því hvaða orðalag og innihald fólki þykir best. Þetta er orðið held ég fimm ára ferli.“

Skátaheitið hefur hingað til innihaldið orðalagið: „Ég lofa að gera það sem í mínu valdi stendur til þess að gera skyldu mína við Guð og ættjörðina.“ Nú mega skátar hins vegar ráða því hvort þeir segi „Guð“ eða „samvisku“ og þá hvort þeir segi „ættjörðina“ eða „samfélagið.“ Arnór segir að mjög mörgum hafi þótt orðalagið eins og það var úrelt.

„Svo eru auðvitað margir sem þykir heitið mjög mikilvægt og þykir vænt um það,“ segir Arnór. „En það eru alls ekki allir og við höfum mörg haft það á tilfinningunni að það væri stór hópur sem vildi fá þessu breytt.“

Margar tillögur um breytingar á þessu orðalagi hafa verið lagðar fram og felldar. Arnór segir þær hafa verið misróttækar en þessi sé í mildari kantinum.

„Ég myndi að segja að hún sé mjög lík skátaheitinu eins og það var,“ segir hann. „En þó mikilvæg breyting.“

Skátaþing stendur áfram yfir á morgun, en það sækja fulltrúar allra skátafélaga á landinu og greiða atkvæði um ýmisleg málefni.