Landsbjörg þarf að greiða Ofur-Baldri: Sala tertu ársins 2012 hefði átt að vera bönnuð

Héraðsdómur Reykjavíkur dæmdi í dag Slysavarnafélagið Landsbjörg skaðabótaskylt að hluta gagnvart Baldri Sigurðarsyni tónlistarmanni. Baldur slasaðist illa á gamlárskvöld 2012 er hann fékk skoteld í höfuðið við að sprengja flugeldatertu frá Landsbjörg.

Baldur, eða Ofur-Baldur eins og hann er gjarnan kallaður, sagði sögu sína í sérstökum fréttatíma Stöðvar tvö árið 2013. Hann sagði það þar mildi að hann hafi notast við vélstjóragleraugu sín umrætt kvöld en höfuðkúpa hans brotnaði samt sem áður á þremur stöðum í slysinu og sjón hans tapaðist.

Baldur segir tertuna sem hann keypti á stærð við smábifreið og að hún sé víðast hvar bönnuð í nágrannalöndunum vegna slysahættu. Héraðsdómur komst að þeirri niðurstöðu að sala tertunnar til almennings hefði átt að vera bönnuð vegna „hættueiginleika“ hennar, meðal annars vegna þess að hún hefur heila þrjá kveikiþræði.

Héraðsdómur taldi þó ekki fullsannað að tertan hafi verið gölluð, líkt og Baldur hélt fram. Jafnframt segir í úrskurðinum að fullsannað þyki að Baldur hafi ekki snúið frá tertunni strax og tilefni var til eftir að hafa kveikt í henni. Því sé sanngjarnt að Baldur og Landsbjörg skipti með sér sökinni, Baldur beri 1/3 hluta líkamstjóns síns en Landsbjörg 2/3.