Missti sjón í flugeldaslysi: "Yfirlæknir TR hefur af mér hálfs árs laun"

Baldur Sigurðarson er lögblindur eftir flugeldaslys sem hann varð fyrir um síðustu áramót og hefur verið óvinnufær síðan. Fyrstu beiðni hans um örorkumat var hafnað þar sem mistök voru gerð við umsóknina og segir Baldur að þar hafi verið um að kenna skorti á leiðbeiningum frá starfsmönnum Tryggingastofnunar, enda hafi hann verið illa farinn eftir slysið og þurft á aðstoð að halda. Hann sótti um að nýju og fékk nýlega þau svör að hann væri metinn sem öryrki frá fyrsta júlí, en ekki fyrsta janúar, þegar slysið átti sér stað, þrátt fyrir að læknisvottorð segi til um annað. „Þannig að þarna hefur yfirlæknir Tryggingastofnunar með sinni ákvörðun af mér hálfs árs laun og ég spyr mig hversu algengt er það og hvort það er ekki hreinlega brot í starfi,“ segir Baldur.

Samkvæmt stjórnsýslulögum skal stjórnvald veita þeim sem til þess leitar nauðsynlega aðstoð og leiðbeiningar varðandi þau mál sem snerta starfssvið þess og í lögum um almannatryggingar kemur fram að starfsfólk Tryggingastofnunar og umboðsmenn hennar skuli kynna sér til hlítar aðstæður umsækjenda og bótaþega og gera þeim grein fyrir ýtrasta rétti þeirra. Baldur segir þetta ekki vera raunina. „Sem dæmi, þá komst ég að því að fatlaði eiga rétt á bílastyrk. Tryggingastofnun á auðvitað að upplýsa fólk um þetta en ég hef komist að því að margir sem ég þekki og eru mikið fatlaðir hafa ekki hugmynd um að þeir eigi þennan rétt, þeim er ekki sagt frá því ef þeir spyrja ekki .“

Hjá Tryggingastofnun fengust þau svör að ekki væru gefnar upplýsingar um einstök mál. Almenna reglan væri sú að starfsmenn fylgdu lögum og túlkuðu þau; ef óánægja ríkti með niðurstöður stofnunarinnar væri hægt að kæra þær til úrskurðarnefndar almannatrygginga.

Ætlarðu að kæra þessa niðurstöðu?

„Ég er búinn að biðja um endurútreikning og auðvitað kem ég til með að kæra. Ég þarf bara að ráðfæra mig við lögmann reikna ég með en það kostar tíma og peninga, sem ekki eru til staðar,“ segir Baldur að lokum.