HS veitur komast hjá því að greiða 400 milljónir í skatta

HS veitur ætla að greiða eigendum sínum tvo milljarða króna út úr fyrirtækinu og minnka hlutfé fyrirtækisins um leið. Með þessu sparast fjögur hundruð milljónir sem annars færu í skatta.

Skattgreiðslur af upphæðinni hefðu numið fjögur hundruð milljónum. Júlíus Jónsson forstjóri fyrirtækisins segir þetta fullkomlega löglegt og eðlilegt. Sem íbúi í Reykjanesbæ, sé hann feginn að þessi leið hafi orðið fyrir valinu. Bæjarfélagið fái þá milljarð í staðinn fyrir 800 milljónir. Því veiti ekki af peningunum.

Hafnarfjarðarbær á fimmtán prósenta hlut í HS veitum og fær um 300 milljónir króna. Sandgerðisbær á einnig örlítinn hlut í fyrirtækinu, sem nemur broti úr prósenti.

Ríflega þriðjungur HS veitna er hins vegar í einkaeigu. HSV eignarhaldsfélag sem er í eigu athafnamannsins Heiðars Más Guðjónssonar, lífeyrissjóða og fleiri. Heiðar Már hafði forgöngu um einkavæðingu HS veitna í fyrra ásamt Reykjanesbæ. Þá var keyptur hluti af eign Reykjanesbæjar fyrir einn og hálfan milljarð og allur 16 prósenta hlutur Orkuveitu Reykjavíkur fyrir svipaða upphæð; samtals um þrjá milljarða króna.