Sjötugur maður tekur við starfi Claudio Ranieri

Úrúgvæmaðurinn Sergio Markarian verður næsti þjálfari gríska landsliðsins í fótbolta og muna fá það stóra verkefni að rífa gríska landsliðið upp eftir slæma byrjun í undankeppni EM.

Ítalinn Claudio Ranieri var rekinn út starfinu eftir að Grikkir töpuðu 1-0 á heimavelli á móti Færeyjum í nóvember á síðasta ári en hinn 63 ára gamli Ranieri tók við liðinu eftir HM í Brasilíu síðasta sumar og entist því ekki lengi í starfinu.

Sergio Markarian er sjötugur og þekkir vel til gríska fótboltans eftir að hafa þjálfað þar í sex ár hjá Panathinaikos, Ionikos og Iraklis. Hann var síðast í Grikklandi tímabilið 2004 til 2005.

Þetta verður þriðja landsliðið sem hann þjálfar en hann var einnig landsliðsþjálfari Perú (2010–2014) og Paragvæ (1992–1993 og 1999–2002) á sínum tíma.

Grikkir eru í neðsta sæti í sínum riðli í undankeppni EM með aðeins eitt stig úr fjórum leikjum. Næsti leikur liðsins er á móti Ungverjum 29. mars næstkomandi.