Eins og á stríðssvæði | Myndir

Það varð allt vitlaust þegar Gana og Miðbaugs-Gínea spiluðu til undanúrslita í Afríkukeppninni í gær.

Menn sögðu að ástandið hefði verið eins og á stríðssvæði en hætta varð leik í yfir hálftíma vegna láta í áhorfendum.

Leikmenn þurftu að forða sér þegar flöskum var kastað í þá úr stúkunni, stuðningsmenn Gana urðu að leita skjóls fyrir aftan annað markið, óeirðarlögregla notaði táragas og þyrla sveimaði yfir vellinum. Þetta var eins og í bíómynd. Það vantaði bara Bruce Willis.

Gana var 2-0 yfir í hálfleik og það var meira en stuðningsmenn Miðbaugs-Gíneu þoldu. Þeir réðust á Ganamennina og hentu svo öllu lauslegu inn á völlinn. Steinum, flöskum, spegli og já diskum.

Gana vann leikinn 3-0 að lokum og er komið í úrslit gegn Filabeinsströndinni.