Ríkisstjórnin getur ekki verið stikkfrí

Framkvæmdastjóri Samtaka atvinnulífsins segir ríkisstjórnina einhliða hafa sagt upp áratuga samstarfi stjórnvalda við aðila vinnumarkaðrins. Ríki og sveitarfélög hafi mótað nýja launastefnu sem stefni friði á vinnumarkaði í voða en það sé einsdæmi að opinberir aðilar leiði þróun kjarasamninga.

Þorsteinn Víglundsson framkvæmdastjóri Samtaka atvinnulífsins skrifar harðorðan leiðara á heimasíðu samtakanna í dag þar sem hann segir þær launahækkanir sem ríki og sveitarfélög hafi samið um við einstaka hópa upp á tugi prósenta, séu nú orðnar að kröfum þeirra stéttarfélaga sem hafi lausa samninga í lok febrúar. Ríki og sveitarfélög hafi mótað nýja launastefnu sem stefni friði á almennum vinnumarkaði í voða sem og hjá hinu opinbera því aðrar heilbrigðisstéttir sem eigi eftir að semja muni krefjast sömu hækkana og læknar.

„Ég veit ekki hvernig ríkisstjórnin ætlar að vinna út úr þessari stöðu. En hún er mjög snúin og hefur sett ástandið á almenna vinnumarkaðnum í algert uppnám,“ segir Þorsteinn.

Þetta séu vonbrigði því mikill árangur hafi náðst með samningum í desember 2013 til að auka kaupmátt og ná niður verðbólgu sem nú mælist innan við eitt prósent.

„Það er alveg ljóst að sú staða sem verkalýðshreyfingin á almenna vinnumarkaðnum er sett í vegna þessa er mjög erfið og við höfum ríkan skilning á því,“ segir Þorsteinn.

Það breyti því hins vegar ekki að ef þær launahækkanir sem ríki og sveitarfélög hafi haft forystu um að samþiggja verði velt yfir allan vinnumarkaðinn verði efnahagsleg kollsteypa í samfélaginu.

Ríkisstjórnin svikið ýmislegt. Hún hafi ekki staðið við lækkun tryggingagjalds samhliða minnkandi atvinnuleysi, tekjustofn fæðingarorlofssjóðs hafi verið skertur, framlag til jöfnunar örorkubyrði lífeyrissjóða og réttur til atvinnuleysisbóta sömuleiðis, án samsvarandi lækkunar tryggingagjalds. Þá hafi ríkisstjórnin ákveðið að virða ekki lögbundna skuldbindingu sína til framlags til starfsendurhæfingarsjóðsins Virk. Allt þetta hafi verið samið um á samstarfsvettvangi aðila vinnumarkaðar og stjórnvalda en ríkisstjórnin nú sagt upp einhlíða.

Ríkisstjórnin verði að gera upp við sig hvort hún ætli að eiga samstarf við aðila vinnumarkaðrins eins og stjórnvöld hafi átt undanfarna þrjá áratugi eða ekki.

„Og ætlar hún hins vegar að axla ábyrgð á þeirri stöðu sem komin er upp á opinbera vinnumarkaðnum og hafa þá frumkvæði að því að leysa úr henni með einhverjum hætti,“ segir Þorsteinn. Ríkisstjórn geti ekki fríað sig ábyrgð og staðið til hliðar í þeim viðræðum sem framundan séu.

„Nei, engan veginn. Það blasir algerlega við hvar var farið út af sporinu í síðustu kjarasamningalotu og á því verða stjórnvöld að bera ábyrgð," segir  Þorsteinn Víglundsson.