Miðbæjarslagur í átta liða úrslitum

Kvennaskólinn í Reykjavík mætir Menntaskólanum í Reykjavík í átta liða úrslitum spurningakeppni framhaldsskólanna, Gettu betur. Lið beggja skóla fóru einkar auðveldlega í gegnum aðra umferð sem lauk í kvöld og má reikna með hörkukeppni.

Fyrsta viðureign átta liða úrslitanna verður 28. janúar þar sem Flensborgarskólinn í Hafnarfirði mætir Fjölbrautarskóla Vesturlands. Viku síðar mætast Fjölbrautarskóli Suðurnesja og Fjölbraut í Garðabæ. 11. febrúar er svo Lækjargötuslagurinn áður en Menntaskólinn við Hamrahlíð mætir Menntaskólanum á Akureyri viku síðar.

Menntaskólinn við Hamrahlíð á titil að verja eftir 27-18 sigur á Borgarholtsskóla í úrslitum í fyrra. Um var að ræða fyrsta sigur MH í keppninni. Fögnuðu liðsmenn MH sigrinum vel og innilega og rákust meðal annars á Óskarsverðlaunahafa áður en nóttin var úti. MH-ingar þykja afar sigurstranglegir í keppninni í ár en tveir af þremur úr sigurliðinu í fyrra eru enn í liðinu.

Uppfært klukkan 23:59

Í fyrirsögn stóð að um Lækjargötuslag væri að ræða. Hið rétta er að Kvennaskólinn stendur við Fríkirkjuveg.