Vara við lífshættulegu efni í ecstasytöflum

Sænska lyfjastofnunin hefur varað við ecstasytöflum sem orsakað hafa eitt dauðsfall og nokkurn fjölda eitrunartilfella þar í landi en þetta kemur fram í tilkynningu frá Lyfjastofnun Íslands.

Þar segir að tafla sem var afhent sænsku lyfjastofnuninni til greiningar reyndist innihalda efnið PMMA í magni sem getur valdið hækkuðum líkamshita og eitrunaráhrifum sem í versta falli geta leitt til dauða.

Taflan sem afhent var til greiningar er appelsínugul að lit, fimmstrend og með upphleyptan bókastafinn S báðum megin. Töflur með framangreint útlit hafa tengst eitrunartilfellunum sem um ræðir.

Í tilkynningunni segir að í ljós hafi komið að svipaðar töflur hafa verið í umferð í Hollandi og hafa þær töflur innihaldið PMMA í magni sem telst vera lífshættulegt.

Ennfremur hefur verið tilkynnt um fjögur dauðsföll í Englandi og eitt dauðsfall í Skotlandi sem eru talin tengjast þessu hættulega efni. Það er mat Lyfjastofnunnar að ekki sé hægt að útiloka að töflur með PMMA hafi borist til Íslands.

Ecstasytöflur innihalda venjulega MDMA sem er vímuvaldandi efni. PMMA er efnafræðilega skylt og er stundum selt sem ecstasy, en er mun hættulegra.

Taflan sem var efnagreind á sænsku lyfjastofnuninni reyndist innihalda 169 mg af PMMA (p-methoxy-N-methylamfetamin) en talið er að 40-50 mg af efninu geti valdið hættulegri hækkun á líkamshita. Efnið getur einnig valdið heilabólgum, blóðrásartruflunum, eyðileggingu á vöðva- og lifrarfrumum, og í alvarlegustu tilfellum dregið neytandann til dauða. Virkni PMMA kemur fram á nokkrum klukkustundum og varir í nokkrar klukkustundir.

Einkenni eitrunar geta verið skjálfti og svitaköst, og síðan hröð hækkun á líkamshita, hækkuð hjartsláttartíðni og hækkaður blóðþrýstingur. Þegar áfengis er einnig neytt eða ef líkaminn er þurr, geta áhrifin verið banvæn.

„Töflur með útliti sem myndin hér fyrir neðan sýnir geta verið lífshættulegar og skal alls ekki neyta þeirra. Ekki er hægt að útloka að ecstasy töflur eða hylki með annað útlit innihaldi einnig PMMA. Glær hylki með hvítu dufti eða bleiklitaðar töflur eru taldar tengjast dauðsfalli og alvarlegum eitrunum í Skotlandi.“