Með efnin falin innanklæða

Íslenska konan, sem var handtekin á Schiphol-flugvelli í síðustu viku, var með efnin falin innan klæða samkvæmt upplýsingum frá lögreglunni í Hollandi.

Konan situr nú í gæsluvarðhaldi en hún var með 300 grömm af MDMA í duftformi falin á sér. Konan var handtekin á Schiphol-flugvellinum í Amsterdam, höfuðborg Hollands á sunnudaginn í síðustu viku.

Konan hafði dvalist stutt í Hollandi og var á leið aftur til Íslands. Hún var leidd fyrir dómara 17. desember síðastliðinn þar sem hún var úrskurðuð í gæsluvarðhald. Konunni hefur verið úthlutað lögmanni þar í landi sem mun sjá um mál hennar.

Borgaraþjónusta utanríkisráðuneytisins er að aðstoða konuna og ættingja hennar við málið. Konan á tvö börn sem urðu eftir hér á landi en samkvæmt upplýsingum Fréttablaðsins mun konan ekki koma heim til Íslands yfir hátíðarnar. Lögreglan vildi ekki tjá sig um hversu langan dóm konan gæti fengið vegna smyglsins.