Fimm og hálfs árs fangelsi fyrir tilraun til manndráps

Hæstiréttur hefur dæmt Hrannar Pál Róbertsson í fangelsi í 5 og ½ ár fyrir tilraun til manndráps, þrjá þjófnaði og akstur undir áhrifum ávana- og fíkniefna. Þá hefur hann verið sviptur ökuréttindum ævilangt. Þar með staðfesti Hæstiréttur dóm Héraðsdóms Reykjavíkur frá því í desember síðastliðnum.

Hrannar játaði skýlaust fyrir dómi þjófnaðina og akstur undir áhrifum. Hann neitaði hins vegar að hafa gerst sekur um tilraun til manndráps.

Í ákæru er manndrápstilrauninni lýst á þann veg að ákærði hafi stungið fórnarlambið fyrirvaralaust í bakið í maí 2013. Hnífurinn gekk inn í vinstra lunga mannsins með þeim afleiðingum að hann fékk 3 sentímetra langt stungusár vinstra megin aftan á brjóstkassa, lunga hans féll saman og hann hlaut blæðingu í lungnavefjum, eins og segir í ákæru. Samkvæmt læknisvottorði sem lagt var fram fyrir dómi gekk hnífurinn 12 sentímetra inn í manninn.

Fyrir dómi neitaði Hrannar því að um ásetning hafi verið að ræða og kvað hnífinn hafa rekist í manninn. Ákærði var látinn sæta geðrannsókn til þess að meta mætti hvort hann bæri skynbragð á það sem gerðist hafði og gæti talist sakhæfur.

Geðlæknir taldi ákærða sýna merki geðrofseinkenna sem stöfuðu af mikilli neyslu fíkniefna. Hann hefði á þeim tíma sem hann stakk manninn verið í mikilli neyslu amfetamíns og MDMA. Geðlæknir taldi Hrannar engu að síður sakhæfan.

Fjöldi annarra vitna kom fyrir dóminn, þar á meðal sérfræðilæknir og lögreglumenn. Vitnisburður Hrannars var ekki talinn trúverðugur auk þess sem hann átti sér enga stoð í öðru sem kom fram í málinu, eins og segir í dómnum. Þá kemur fram að hann myndi atburðina ekki vel.

Vitnisburður fórnarlambsins er hins vegar talinn trúverðugur auk þess sem vitnisburðir sérfræðilæknis og lögreglumanna voru í samræmi við vitnisburð hans.

Hrannar var því dæmdur í 5 og ½ árs fangelsi. Þá var hann dæmdur til bótagreiðslna og til að greiða allan sakarkostnað.

Dóminn má sjá í heild sinni hér.