Ákærður fyrir innflutning á 555 MDMA-töflum

22 ára karlmaður hefur verið ákærður fyrir stórfellt fíkniefnalagabrot með því að hafa staðið að innflutningi á 555 MDMA töflum og rúmlega 64 grömmum af kókaíni í júní 2012. Miðað við 22% styrkleika er hægt að framleiða um 232 grömm af efni úr kókaíninu sem talið er að hafi verið ætlað að selja í ágóðaskyni.

MDMA töflur hafa verið töluvert í umræðunni undanfarna daga í kjölfar umfjöllunar Bresta um unga konu sem lét lífið í nóvember. Banamein hennar var margfaldur dauðaskammtur af eiturlyfinu MDMA sem virðist vera vinsælt meðal ungs fólks í dag.

Maðurinn var handtekinn við komuna til Íslands frá Kaupmannahöfn en efnin fundust bæði innan klæða en einnig falin í líkama hans. Þá er hann einnig ákærður fyrir að hafa haft 0,66 grömm af maríhúana í vörslum sínum við húsleit lögreglu sama ár.

Maðurinn hefur áður komið við sögu lögreglu en hann var dæmdur í sex mánaða skilorðsbundið fangelsi árið 2009 fyrir innbrot í fimm grunnskóla á höfuðborgarsvæðinu og tvö einbýlishús. Verðgildi varningsins sem stolið var var á aðra milljón króna. Var tekið tillit til þess við dóminn að maðurinn átti ekki sakaferil að baki og var aðeins fimmtán og sextán ára þegar brotin voru framin.

Þá var maðurinn dæmdur í fimmtán mánaða skilorðsbundið fangelsi í febrúar 2012 fyrir að hafa rænt tvö útibú Domino's Pizza.

Annars vegar útibúið í Spönginni í febrúar 2011 ásamt þremur félögum sínum. Höfðu þeir á brott með sér rúmlega 196 þúsund krónur en ákærði tók vaktstjórann kverkataki, þrýsti honum upp að vegg og hótaði til að fá upplýsingar um hver peningarnir væru geymdir. Hins vegar var maðurinn einn fimm sem rændu útibú Domino's við Hjarðarhaga. Höfðu þeir á brott með sér 85 þúsund krónur í reiðufé.

Ákæran á hendur manninum fyrir fíkniefnabrot verður þingfest í héraði á fimmtudaginn.