Gleði og samstaða í boðhætti

Katrín Jakobsdóttir formaður VG segir að það sem Sigmundur Davíð Gunnlaugsson forsætisráðherra talaði ekki um í áramótaávarpi sínu hafi vakið mesta athygli sína.

„Staðan á vinnumarkaði hefur verið mjög ólgusöm á árinu og það lítur ekki vel út með kennaraverkfall, læknadeiluna og lagasetningu á ýmis önnur verkföll,“ segir Katrín og minnir á að læknadeilan sé enn óleyst. Hún segist búast við að þjóðin hafi búist við því að ráðherrann myndi minnast á þetta sem hann hafi ekki gert með einu orði.

Ávarp forsætisráðherra var Ísland best í heimi ávarp að mati Helga Hjörvars þingmanns Samfylkingarinnar sem segir þó að ríka fólkið hafi vissulega ástæðu til að gleðjast yfir því sem ríkisstjórnin hafi fært því á árinu. Það sé hinsvegar að strá salti í sárin að tala enn og aftur um að það eigi að bætta kjör milli- og lágtekjufólks, nokkrum klukkustundum áður en ríkisstjórnin hækkar matarskattinn og hendir nokkur hundruð einstaklingum af atvinnuleysisbótum.

Guðmundur Steingrímsson formaður Bjartrar framtíðar, segir að gleði- og samstöðuboðskapur forsætisráðherra í áramótaávarpinu hafi verið í boðhætti. Hann lýsir eftir raunsæi og segir að það sé alls ekki alltaf gott verður, frekar en núna. „Það vantaði raunsæi í ræðuna, það eru ýmis verkefni sem þarf að leysa, eins og læknadeilan og fleira. Það er ekki alltaf bara gott veður, eins og núna. Það er frekar napurt,“ segir Guðmundur.