Réttað yfir þingmönnum Gullinnar Dögunar

Forystumenn gríska öfgahægriflokksins Gullin dögun eru meðal þeirra 69 sem dregnir hafa verið fyrir rétt í sértilbúnum dómsal í fangelsi í Aþenu. Hinum ákærðu er meðal annars gert að sök að hafa átt aðild að morði rapparans Pavlos Fissas árið 2013.

Gullin dögun, stjórnmálaflokkur sem er andvígur innflytjendum, náði átján mönnum inn á þing í þingkosningunum árið 2012 og eru allir þeirra í hópnum sem nú er réttað yfir. Flokkurinn hefur ítrekað verið vændur um að vera nýnasistahópur og standa fyrir árásum á innflytjendur.

Réttarhöldin koma í kjölfar rannsóknar á dauða Fissas, sem stunginn var til bana af manni við tengsl við Gullna dögun. Fissas, sem rappaði undir listamannsnafninu Killah P, deildi meðal annars á kynþáttahatur í textum sínum.

BBC greinir frá því að stuðningsmenn flokksins hafi ráðist á vitni fyrir utan fangelsið þar sem réttarhöldin fara fram, þrátt fyrir mikinn viðbúnað lögreglu. Búist er við því að réttarhöldin muni taka ár hið minnsta.