Svíar taka lénið af síðu The Pirate Bay

Héraðsdómur Stokkhólms felldi í gær dóm um að þekktasta lén ólöglegu sænsku niðurhalssíðunnar The Pirate Bay, thepiratebay.se, yrði gert upptækt. Sænska ríkið er nú skráð eigandi lénsins sem og varalénsins piratebay.se. Þetta er í fyrsta skipti sem sænskur dómstóll fjarlægir lén af netinu. Samkvæmt dómnum má stofnunin sem heldur utan um lén í Svíþjóð ekki selja lénið áfram til annars aðila.

Málið var höfðað gegn Punkt SE, stofnuninni sem heldur utan um sænsk lén. Punkt SE hélt því fram við réttarhöldin að sú leið að loka fyrir lén væri röng og myndi ekki skila árangri í baráttunni gegn ólöglegu niðurhali.

Lögreglan í Svíþjóð lokaði á svipaðan hátt síðu The Pirate Bay í vetur en ekki leið á löngu þar til hún spratt upp aftur. Talsmenn síðunnar segja að það sama verði uppi á teningnum núna. Síðan muni einfaldlega flytja sig yfir á eitt fjölmargra léna sinna sem ekki hafi verið lokað.

Sýslumaðurinn í Reykjavík lagði í nóvember síðastliðnum lögbann á að Síminn veitti aðgang að síðunni sem og íslensku síðunni Deildu.net í gegnum lénin deildu.net, deildu.com, iceland.pm, thepiratebay.se, thepiratebay.sx og thepiratebay.com. Þær síður eru hins vegar enn aðgengilegar á öðrum lénum en voru bönnuð. Í framhaldinu lokuðu önnur fjarskiptafyrirtæki fyrir aðgang að sömu lénum.