Merkel ítrekar ábyrgð Þjóðverja á helförinni vegna ummæla Netanyahu

Ummæli Benjamin Netanyahu, forsætisráðherra Ísraels, um helförina sem féllu á dögunum hafa fallið í afar grýttan jarðveg víða um heim. Ráðherrann staðhæfði þar að nasistarnir, með Adolf Hitler í broddi fylkingar, hafi á sínum tíma aðeins viljað senda gyðinga úr landi, en ekki drepa þá. 

Netanyahu segir að það hafi verið Múftinn af Jerúsalem, Haj Amin al-Husseini, sem hafi talið honum hughvarf og hvatt hann til að drepa gyðingana í stað þess að þröngva þeim úr landi.

Þessari söguskoðun eru nær allir sagnfræðingar heimsins ósammála og Angela Merkel Þýskalandskanslari sá sig knúna til þess í gær að ítreka ábyrgð Þjóðverja á ódæðinu sem framið var þegar sex milljónir gyðinga voru drepnar í Seinni heimsstyrjöldinni. Hún segir það skýrt hjá öllum Þjóðverjum að nasistum hafi verið um að kenna, og engum öðrum.