Dreifði nektarmyndum af barnsmóður

Hæstiréttur Íslands hefur fellt úr gildi úrskurð Héraðsdóms Reykjavíkur um að karlmaður sæti nálgunarbanni í sex mánuði. Maðurinn er grunaður um að hafa ráðist á barnsmóður sína og dreift af henni nektarmyndum. Dómurinn taldi ekkert benda til þess að maðurinn hefði beitt konuna líkamlegu ofbeldi eða að hætta væri á að hann myndi brjóta gegn henni með þeim hætti.

Konan sagði manninn meðal annars hafa hrint sér niður stiga þegar hún var með unga dóttur þeirra í fanginu. Þá hafi hann einnig hent henni inn í eldhús á eldhúsinnréttingu og að krafturinn hafi verið það mikill að hún hafi þeyst yfir og höfuð hennar rekist í eldhúsbekk hinum megin í eldhúsinu. Maðurinn var yfirheyrður vegna málsins en neitaði sök. Þá er hann sagður hafa hent ferðatösku í tíu ára dóttur konunnar.

Í greinargerð lögreglustjóra segir að maðurinn hafi í byrjun mánaðar sent kynlífsmynd og nektarmyndband af konunni á vinkonu hennar og vinnufélaga. Því játaði maðurinn. Taldi lögreglustjóri að háttsemi mannsins gæfi til kynna að hætta væri á að hann myndi halda áfram að raska friði konunnar, nyti hann fulls athafnafrelsis. Ekki sé talið sennilegt að friðhelgi hennar verið vernduð með öðrum og vægari hætti eins og sakir standa.