Hæstiréttur staðfestir nálgunarbannið

Hæstiréttur Íslands hefur staðfest sex mánaða nálgunarbann yfir karlmanni á sjötugsaldri. Héraðsdómur Norðurlands eystra kvað upp þennan úrskurð í síðustu viku og var þeim úrskurði áfrýjað til Hæstaréttar sem hefur staðfest hann.

Með nálgunarbanninu, sem mun vara í sex mánuði, er manninum bannað að koma á eða í námunda við heimili Ásdísar Viðarsdóttur á svæði sem afmarkast við fimmtíu metra radíus mælt frá miðju íbúðar hennar. Auki er honum bannað ð setja sig í samband við brotaþola, nálgast hana á almannafæri, vinnustað hennar eða hafa samskipti við hana í síma, tölvu eða á annan hátt.

Ásdís og maðurinn sem um ræðir bjuggu saman í um tíu mánuði árið 2011 en er samvistum þeirra lauk hefur hann áreitt hana ítrekað. Í júní féll dómur í Héraðsdómi Reykjaness þar sem maðurinn var sakfelldur fyrir líkamsárás, um átta hundruð brot á nálgunarbanni og brot gegn barnaverndarlögum. Hann hlaut fimmtán mánaða dóm, þar af þrjá mánuði óskilorðsbundna. Dómnum hefur verið áfrýjað til Hæstaréttar.

Í kjölfar áfrýjunarinnar hófust ofsóknirnar á nýjan leik og snýst nálgunarbannið nú um skilaboð sem henni bárust eftir það. Í upphafi júlímánaðar bárust Ásdísi um fjörutíu SMS auk fimm boð í einkapósti frá manninum.