Sextán ára stúlka dæmd í níu ára fangelsi fyrir að myrða móður sína

Dómstóll í Danmörku dæmdi í gær sextán ára stúlku í níu ára fangelsi og 29 ára vin hennar í þrettán ára fangelsi fyrir morð á móður stúlkunnar.

Í frétt TV2 segir að hin fertuga Tine Rømer Holtegaard hafi látist af völdum sára sem hún hlaut vegna hnífstungna þar sem hún lá sofandi í rúmi á heimili sínu í Kvissel á Norður-Jótlandi í október á síðasta ári.

Dóttirin Lisa Borch og hinn 29 ára Bakhtiar Mohammed Abdullah væru dæmd sek í síðustu viku, en greint var frá ákvörðun refsingar í gær. Abdullah, sem er írakskur ríkisborgari, verður jafnframt vísað úr landi þegar hann er búinn að afplána dóm sinn.

Danska blaðið BT ræddi við eiginmann hinnar látnu og stjúpföður Lisu, Jens Holtegaard, eftir að dómur féll í gær. Hann segir að Lisa hafi lent í slæmum félagsskap og umturnast mánuðina fyrir morðið eftir að hafa hafið störf á veitingastað í Frederikshavn þar sem hún hafi meðal annars kynnst Abdullah. Þá lýsir hann henni sér sérstaklega undirförulli og gjörólíkri tvíburasystur sinni sem einnig bjó á heimilinu.

Lisa hringdi sjálf á lögreglu og tilkynnti að hún hafi komið að móður sinni útaðtaðri í blóði. Hún var ein í húsinu þegar lögregla mætti á vettvang en var handtekin nokkru síðar eftir að lögregla fann engin merki þess að brotist hafi verið inn í húsið. Þá þótti hegðun hennar grunsamleg og lýstu bæði lögreglumenn og sjúkralið því að hún hafi verið bæði róleg og köld í fasi. Nokkrum klukkustundum síðar var Abdullah handtekinn vegna gruns um aðild að morðinu.

Í yfirheyrslum skiptust þau Lisa og Abdullah á að saka hvort annað um að hafa borið ábyrgð á dauða Tinu. Í dómnum segir að blóð úr Tinu hafi fundist í fötum Abdullah og upplýsingar úr síma Lisu sýndu fram á að hún hafi hringt í leigubíl fyrir Abdullah og í fleiri vini sína, áður en hún hringdi í neyðarlínuna. Þá þykir ljóst að Lisa hafi ekki veitt móður sinni fyrstu hjálp líkt og starfsmaður Neyðarlínunnar skipaði henni að gera.