Markadrottning HM 2015 leggur skóna á hilluna

Þýska landsliðskonan Celia Sasic er hætt í fótbolta, aðeins 27 ára að aldri.

Sasic tilkynnti þetta á Facebook-síðu sinni í morgun. Þar segir hún að það sé tími til kominn að fara aðrar leiðir í lífinu; ljúka námi, stofna fjölskyldu o.s.frv. Hún þakkar einnig þeim sem studdu hana í gegnum ferilinn, þ.á.m. foreldrum sínum og eiginmanni.

Það er óhætt að segja að Sasic hætti á toppnum en hún varð markadrottning HM í Kanada sem lauk í byrjun mánaðarins. Sasic skoraði sex mörk fyrir Þýskaland sem endaði í 4. sæti mótsins.

Alls gerði Sasic 63 mörk í 111 landsleikjum en hún varð Evrópumeistari með Þýskalandi 2009 og 2013, auk þess sem hún vann til bronsverðlauna með þýska liðinu á Ólympíuleikunum í Peking 2008.

Sasic, sem kamerúnskan föður og franska móður, átti einnig góðu gengi að fagna með félagsliði sínu, Frankfurt, en hún vann Meistaradeild Evrópu með liðinu í vor. Hún lék áður með Bad Neuenahr í Þýskalandi.

Liebe Fans,Fußball ist meine Leidenschaft. Fußball begleitet mich schon mein ganzes Leben und wird auch immer ein Teil...

Posted by Celia Šašić on Thursday, July 16, 2015