Hundruðir þúsunda innlyksa

Hundruðir þúsunda manna hafa orðið innlyksa vegna flóða í Indlandi. Íbúum í suðurhluta Pakistan hefur verið ráðlagt að yfirgefa heimili sín. Flóðin sem nú geysa í Kashmir héraði, sem er stýrt af bæði Indlandi og Pakistan, eru þau verstu á svæðinu í áratugi.

Samkvæmt BBC hafa rúmlega 450 manns látíð lífið í flóðunum og herir landanna hafa verið kallaðir út.

Embættismenn Indlands í Kashmir segja BBC að um 400 þúsund manns komist hvorki land né strönd vegna vatnavaxta og að rúmlega tvö hundruð manns hafi dáið þeirra megin í Kashmir. Sjö hundruð þúsund manns hafa yfirgefið heimili sín.

Í hluta Pakistan hafa 254 dáið og þúsundum verið gert að yfirgefa heimili sín.

AP fréttaveitan segir hermenn hafa notast við báta og þyrlur til að koma mat og nauðsynjum til fjölskyldna sem sitja fastar og bjarga fólki frá drukknun.

Þrátt fyrir að þeirri miklu rigningu sem fór yfir svæðið sé lokið, er gert ráð fyrir að flóðin muni fara yfir hundruði þorpa til viðbótar.