Oddvitaáskorunin - Hitti næstum því Russell Crowe

Vísir stendur fyrir Oddvitaáskoruninni 2014 þar sem skorað er á oddvita allra flokka í kjördæmum um land allt að taka þátt.

Ingvar Arnarson er einn af oddvitum lista FÓLKSINS- í bænum í Garðabæ.

Hann er uppalinn Garðbæingur og á djúpar rætur þar. Ingvar er kennslustjóri íþrótta í Fjölbrautaskólanum í Garðabæ, áður en hann tók til starfa þar var hann náttúrufræðikennari í Garðaskóla.

Ingvar hefur mikin áhuga á íþróttum og er aðeins eitt félag sem á huga hans allan og það er Stjarnan.

Hann hefur spilað með öllum meistarflokkum félagsins þ.e.a.s. í blaki, körfu, handbolta og knattspyrnu einnig á Ingvar félagsmet Stjörnunnar í spjótkasti.

Helstu áhugamál fyrir utan íþróttir eru stang- og skotveiði. Ingvar er veiðimaður af guðs náð og er þessa dagana að veiða atkvæði.

Að öllu gamni slepptu segist Ingvar vera eðal Garðbæingur sem sé tilbúinn að leggja mikið á sig fyrir bæjarbúa.

YFIRHEYRSLAN

Hver er fallegasti staðurinn á Íslandi? 

Sauðholt í Ásahreppi.

Hundar eða kettir?

Ég er hundakall. Á labradorhund sem heitir Skuggi og er hann einn af fjölskyldunni.

Hver er stærsta stundin í lífinu? 

Fæðing barna minna og hvolpana hans Skugga(barnabörnin).

Hver er uppáhaldsmaturinn þinn? 

Grilluð villibráð.

Hvernig bíl ekur þú?

Izusu upptakara(pick-up) árgerð 2004, ekinn 200.005 km.

Besta minningin? 

Á margar stórkostlegar minningar frá uppvexti mínum í Garðabæ.

Hefur þú verið tekinn af lögreglunni?

Bara nokkrum sinnum. Bara einu sinni verið settur í klefa en það var bara í stutta stund.

Hverju sérðu mest eftir?

Þegar ég pissaði óvart á vin minn. Ég vona að hann geti fyrirgefið mér.

Draumaferðalagið? 

Falleg ganga um ósnortið hraunið í miðnætursólinni í Garðabæ.

Hefur þú migið í saltan sjó? 

Já á mörgum bátsferðum mínum í gegnum tíðina hef ég gert það og svo óvart á vin minn líka.

Hvað er það skrýtnasta sem þú hefur gert?

Þegar við félagarnir vorum staddir í Madríd fyrir nokkrum árum og sungum Bobby McFerrin slagarann Don´t worry be happy við ansi magnaðar aðstæður.

Hefur þú viðurkennt mistök? 

Já enda trúi ég á að mistök séu til þess að læra af þeim.

Hverju ertu stoltastur af?

Strákunum mínum, þeir eru sólargeislarnir í lífi mínu.

Fram að sveitarstjórnarkosningunum 31. maí munum við birta kynningu á oddvitum víðsvegar um landið. Allir oddvitar geta tekið þátt í Oddvitaáskorun Vísis. Nánari upplýsingar er hægt að nálgast á netfanginu samuel@365.is.