Ferðakaupstefnan Vest Norden Travel Mart hefst á morgun

Inga Hlín Pálsdóttir, forstöðumaður ferðaþjónustu og skapandi greina hjá Íslandsstofu mun setja Vest Norden Travel Mart ferðakaupstefnuna í 29. skiptið á morgun, þriðjudag, í Laugardalshöll.

Vestnorden Travel Mart er kaupstefna í ferðaþjónustu sem haldin er á Norður-Atlantshafssvæðinu. Íslandsstofa er framkvæmdaaðili ferðakaupstefnunnar í samstarfi við ferðamálasamstarf Norður-Atlantshafsins, en meginhlutverk þess er að móta sameiginlega stefnu í ferðamálum fyrir svæðið Grænland, Ísland og Færeyjar og styrkja ýmis verkefni sem efla ferðaþjónustu innan þess.

Ferðakaupstefnan er haldin annað hvert ár á Íslandi og hin árin til skiptis í Færeyjum eða á Grænlandi.

Peter Greenberg, frummælandi ferðakaupstefnunnar, var útnefndur af Travel Weekly árið 2012 sem einn af áhrifamestu mönnum ferðaþjónustunnar ásamt þeim Bill Marriot og Richard Branson.

Peter Greenberg er reglulegur gestur í þekktum sjónvarpsþáttum vestanhafs eins og Oprah Winfrey Show og The View. Peter Greenberg sendir út frá Íslandi og mun taka nokkra góða Íslendinga tali fyrir þátt sinn sem síðar verður útvarpað í Bandaríkjunum.

Peter Greenberg mun jafnframt sitja fyrir svörum á blaðamannafundi kaupstefnunnar kl. 12:15 þann 30. september ásamt Ingu Hlín Pálsdóttur, forstöðumanni ferðaþjónustu og skapandi greina hjá Íslandsstofu, Ólöfu Ýrr Atladóttur, ferðamálastjóra, Anders Stenbakken, framkvæmdastjóra Visit Greenland og Guðrið Højgaard, framkvæmdastjóra Visit Faroe Islands.

Kaupstefnan fær aukið vægi á hverju ári í takt við aukinn fjölda ferðamanna að sögn Ingu Hlínar.

„Ísland, Grænland og Færeyjar eru allt áfangastaðir sem búa yfir einstökum tækifærum fyrir ferðamenn. Náttúran, fólkið og menningin eru eiginleikar sem áfangastaðirnir þrír deila að einhverju leyti og við finnum mikinn styrk í því að geta unnið saman á þessum vettvangi að því að kynna löndin saman. Löndin bjóða öll spennandi og fjölbreytta ferðaþjónustu sem fellur vel að þörfum okkar markhópa,“ segir Inga Hlín í tilkynningu sem Íslandsstofa sendir frá sér.