Fyrsta aukaspyrnumark Argentínumanns í 32 ár

Lionel Messi er búinn að geta betur en Diego Armando Maradona á HM það er þegar kemur að því að skora mark beint úr aukaspyrnu.

Diego Armando Maradona var þekktur fyrir að skora mörk beint úr aukaspyrnum en hann náði þó aldrei að skora beint úr aukaspyrnu á HM.

Messi skoraði beint úr aukaspyrnu á móti Nígeríumönnum í gær og varð aðeins fimmti Argentínumaðurinn til þess að skora beint úr aukaspyrnu í úrslitakeppni heimsmeistarakeppninnar.

Það voru liðin rétt tæp 32 ár síðan að argentínskur leikmaður skoraði úr aukaspyrnu en Daniel Passarella hafði skorað síðasta aukaspyrnumark Argentínumanns í leik á móti Ítalíu á HM á Spáni 1982.

Lionel Messi varð um leið aðeins annar Argentínumaðurinn sem skorar í öllum þremur leikjum riðlakeppninnar á HM en því hafði ekki Argentínumaður náð síðan að Omar Oreste Corbatta skoraði í öllum leikjum argentínska liðsins í riðlakeppni á HM í Svíþjóð 1958.



Aukaspyrnumörk Argentínumanna í sögu úrslitakeppni HM:

Luis Monti - á móti Frakklandi á HM 1930

Ernesto Belis - á móti Svíþjóð á HM 1934

Miguel Ángel Brindisi - á móti Brasilíu á HM 1974

Daníel Passarella - á móti Ítalíu á HM 1982

Lionel Messi - á móti Nígeríu á HM 2014