Telja húsin liggja undir skemmdum vegna sprenginga

Sprungur eru farnar að myndast á byggingum í Norðurmýrinni í Reykjavík, sem íbúar segja að  rekja megi til sprenginga á svokölluðum Einholtsreit. Íbúar í Norðurmýrinni eru orðnir langþreyttir á titringi, sem líkja má við öfluga jarðskjálfta, vegna sprenginganna, sem hófust þann fjórða apríl síðastliðinn og hefur verið sprengt allt upp í fimm sinnum á dag.

Helga Gerður Magnúsdóttir er íbúi á Gunnarsbraut í Norðurmýri og hefur ekki farið varhluta af sprengingunum og öllu því sem tilheyrir þeim. „Þetta er verulega þreytandi. Hér leikur allt á reiðiskjálfi nokkrum sinnum á dag. Þetta kemur illa við mann, því þetta er eins og jarðskjálftar eða eins og að búa við loftárásir.“

Hús Helgu Gerðar er byggt árið 1939 í þessu friðsama og rótgróna hverfi. Fyrir um þremur árum var húsið gert upp að utan og vandað til verka. Nú í vikunni sá Helga Gerður nýja sprungu í múrhúð hússins sem hún vill rekja til sprenginganna.

„Ég hef aldrei séð þessa sprungu áður, hún var bara að koma fyrir örfáum dögum. Rökréttasta skýringin á þessari nýju sprungu eru framkvæmdirnar í Einholti,“ segir Helga Gerður. „Auðvitað spyr maður sig hvort ekki sé hægt að gera þetta í minni skömmtum og hafa hleðslurnar ögn kraftminni. Þannig þurfa framkvæmdirnar ekki að valda svona miklum óþægindum og eignatjóni.“

Aðalgeir Hólmsteinssonn, umsjónarmaður framkvæmda, segir áhrif framkvæmdanna alltaf hafa verið ofarlega í huga þeirra sem standa að verkinu. Takmarkið væri að valda sem minnstu ónæði nágranna.

„Áður en vinna við sprengingar á reitnum hófst, fór verktakinn sem sér um þennan þátt framkvæmda  ásamt tryggingafélagi sínu og tók út húsin í næsta nágrenni  byggingareitsins. Við úttekt er ytra byrði húsa metið ásamt burðarvirki þeirra. Staðsetning hússins á Gunnarsbraut er fyrir utan það svæði sem tryggingafyrirtækið skilgreinir sem áhrifasvæði.“

„Við höfum farið mjög varlega í þessum efnum og gert meiri kröfur en reglugerðir kveða á um til að lágmarka hættu á tjóni og gætum þess svo jafnframt að sprengingar á svæðinu hafi sem minnst áhrif á daglegt líf fólks.“

„Sprengingar á reitnum eru nú á lokastigi og vonumst við að geta klárað þennan verkþátt á allra næstu dögum. Þetta hefur gengið vel og er verkið á undan þeirri áætlun sem við gáfum okkur m.v. fyrirliggjandi forsendur. Við höfum og reynt að sinna upplýsingagjöf til íbúa á svæðinu eins og kostur er, þannig að þeir séu meðvitaðir um gang mála.“

Árétting: Rangt var haft eftir Aðalgeir í Fréttablaðinu í dag. Hér birtist fréttin rétt. Blaðamaður harmar þau mistök sem voru gerð.